Almatyda jolaqysynyń differentsialdy tarifin engizý týraly baspasóz máslihaty ótti.
Osydan birneshe apta buryn ákimdik Almatyda jolaqysy qymbattaityny týraly qaýly shyǵarǵan bolatyn. Qaýly qazir qoǵamdyq talqylaýda jatyr. Qoǵam tarapynan maquldanǵan jaǵdaida qaýly ádilet organdarynda tirkelip, bekitiledi.
Búgin qalalyq Jolaýshylar tasymaly kóligi men avtomobil joldary basqarmasynyń ókilderi atalǵan máselege bailanysty túsinikteme berdi.
«Differentsialdy tarif engizýge 1 jyldan astam ýaqyt jumsadyq. Parlamentte qujat maquldandy, Prezident qol qoidy. Mundai tariftiń óz artyqshylyqtary bar. Avtobýspen sirek júretin adamdar 10, 20 ret júrýge jaraityn kartochka ala alady. Turaqty jolaýshylarǵa diskont engizbekpiz. Bolashaqta oblystan adam tasymaldaityn avtobýstar da osy tarifke kóshedi. Bir saǵattyń ishinde basqa kólikke otyrsa, jolaqysy tegin bolatyn bolady. Elektrondy biletke kóshý tasymaldaýshy kásiporyndardyń tabysyn naqtylaýǵa kómektesedi. Bul óz kezeginde demeýqarjyny durys esepteýge septigin tigizedi», - dedi basqarma basshysy Maqsut Isahov.
Jańa júiege sáikes endi jolaýshylar bir márte jol júrisi úshin qolma-qol aqsha tólese, 150 teńge beretin bolady, al eger «Ońai» kartasymen bolsa 80 teńge kóleminde qalady. Ailyq jol júrý bileti men jeńildikter de saqtalady.
Tek metroda ǵana jol aqysy 80 teńge bolyp qalady.
Mamandardyń aitýynsha, kei kezderi «Ońai» apparattary da isten shyǵyp jatady.
«Statistika boiynsha isten shyqqan terminaldar týraly aqparattyń 15-25 paiyzy rastalmai shyǵady. Júrgizýshiler ózderi óshirip tastaidy nemese qasaqana isten shyǵarady. Eger apparat jumys jasamasa, jolaýshy tegin júrýge quqyly. SMS tólemge kelsek, uialy operatorlar da turaqty jumys jasamaidy, biraq onyń bárin qalpyna keltirip jatyrmyz», - dedi «Almaty kólik holdingi» JShS direktory Sadir Hamraev.
Onyń aitýynsha, kartalardy Karavan, Daýys, Azbýka sviazi jelisi dúńgirshekterinde, metro kassalarynda satyp alýǵa bolady.
Qazir qaýly barlyq arnaiy protsedýralardan ótti. Máslihat sheshimimen, Qoǵamdyq keńestiń usynysymen bekitildi.
