Keshe «Qazseldenqorǵaý» MM mamandary Almaty qalasy ákimdiginiń, Almaty qalasy jáne Almaty oblysy TJD ókilderimen birlesip, QR TJM «Qazaviaqutqarý» AQ-nyń Mi-8 AMT tikushaǵymen taýly aýmaqqa aerovizýaldy tekserý júrgizdi, dep habarlaidy ult.kz TJM baspasóz qyzmetine silteme jasap.
Tekserý Ile Alataýy jotasynyń soltústik bóligin - Qaskeleń ózeni alabynan bastap Túrgen ózeni alabyna deiingi aýmaqty qamtydy. Monitoringtiń negizgi maqsaty - muzdaq kólder men muzdyq keshenderdiń, sel arnalarynyń jai-kúiin jáne óńirdegi jalpy sel jaǵdaiyn baǵalaý boldy.
Tekserý nátijeleri boiynsha muzdaq kólderdiń basym bóligi maýsymdyq tolý kezeńinde ekeni anyqtaldy. Sonymen qatar, biik taýly aimaqtaǵy kólder qysqy rejimnen áli tolyq shyqpaǵan. Keibir kólder ornalasý biiktigi men betkei ekspozitsiiasyna bailanysty áli de tolyqtai muz ben qar jamylǵysynyń astynda jatyr. Betki aǵyndar jekelegen ýchaskelerde ǵana baiqalady. Ózenderde sý lailylyǵynyń artý belgileri tirkelgen joq. Taýly aimaqtardaǵy qar jamylǵysynyń qalyńdyǵy 20-dan 50 santimetrge deiin jetedi. Qar syzyǵy teńiz deńgeiinen 3300-3500 metr biiktikte ornalasqan.
Tekserý qorytyndysy boiynsha Almaty qalasy men Almaty oblysy ózenderi alaptaryndaǵy sel jaǵdaiy turaqty dep baǵalanady.
