Foto: videodan skrinshot
Politsiia jarylys, órt qoiý jáne basqa da qaýipter týraly jalǵan habarlamalar taratqandar qylmystyq jaýapkershilikke tartylatynyn eskertti, dep habarlaidy Polisia.kz.
IIM málimetinshe, internet pen áleýmettik jelilerde jasóspirimderdiń jalǵan habarlamalar taratý derekteri jiilegen.
Almaty oblysynda terrorizm aktisi týraly kórineý jalǵan habarlama jasaǵany úshin 9-synyptyń eki oqýshysy ustaldy. Tergeý barysynda olardyń Astana qalasy men Almaty oblysyndaǵy osyndai 14 faktige qatysy bary anyqtalǵan.
Sonymen qatar Shyǵys Qazaqstan oblysyndaǵy 9-synyp oqýshysy áleýmettik jelidegi janjaldan keiin basqa adamdardyń atynan Shymkent qalasy ákimdigi men Aqtaýdaǵy saýda úileriniń birine jarylǵysh zat qoiylǵany týraly elektrondyq hattar jibergen.
Quqyq qorǵaý organdarynyń málimetinshe, olar qylmys jasaý kezinde anonimdi telefon nómirleri men elektrondyq poshtalardy paidalanǵan.
– Bul «ázil» nemese qaljyń bolsa da, mundai áreketter qylmystyq quqyq buzýshylyq bolyp sanalady. Jalǵan qaýip týraly habarlamalar adamdar arasynda dúrbeleń týǵyzyp, shuǵyl qyzmetterdiń jumysyna kedergi keltiredi. Mundai áreketter úshin bas bostandyǵynan aiyrýǵa deiin jaýapkershilik qarastyrylǵan, – dedi Aman Áýbákirov.
IIM Kiberqylmysqa qarsy is-qimyl departamenti basqarma bastyǵynyń orynbasarynyń aitýynsha, mundai jaǵdailardyń barlyǵy muqiiat tekserilip, kúdiktiler zamanaýi tehnologiialardyń kómegimen anyqtalady.
Politsiia azamattardy tekserilmegen aqparat taratpaýǵa jáne balalarǵa mundai áreketterdiń saldaryn túsindirýge shaqyrdy.
Aita keteiik, IIM terrorizm týraly jalǵan aqparat taratqandar da qylmystyq jaýapqa tartylatynyn málimdedi.
