Almaty oblysynyń Uiǵyr aýdanynda shatyry opyrylyp ortasyna túsken sport kesheniniń qurylysy áli toqtap tur, dep habarlaidy "Ult aqparat".
Al qujat boiynsha bul nysan 2021 jyldyń birinshi qańtarynda tapsyrylýy tiis bolǵan. Qazir qurylysyna 1 mlrd teńgeden asa qarajat bólingen dene shynyqtyrý-saýyqtyrý kesheninde tym-tyrys. Kúzetshiden basqa eshkim joq.
«Qazirgi tańda tehnikalyq negizdemesin kútip otyrmyz. Qulaǵan úshinshi blok qaitadan turǵyzylady. Munan bólek birinshi jáne ekinshi bloktardyń irgesin kúsheitý jumystary júrgiziledi. Keltirilgen shyǵyndardy merdiger kásiporyn ózi óteidi»,- dedi Almaty oblystyq Qurylys basqarmasynyń bólim basshysy Aiat Sábitov.
Esterińizge sala keteiik, osydan bes ai buryn Uiǵyr aýdanynda salynyp jatqan sport kesheni opyrylyp qulady. Abyroi bolǵanda eshkim zardap shekken joq. Tekserý barysynda qatelikti jobalaýshylar da, qurylysshylar da jibergeni anyqtaldy. Mamandar shatyrdyń qulaýynan 55 mln teńge kóleminde shyǵyn kelgenin aitady.
