Almaty oblysynda paraplanmen ushqandar jaryq baǵanasyna soǵylyp, eki adam aýrýhanaǵa tústi. Qazir 50 jastaǵy azamattyń jaǵdaiy óte aýyr, jansaqtaý bóliminde jatyr, dep habarlaidy "Ult aqparat".
Oqys oqiǵanyń barysy videoǵa túsip qalǵan.
«9 mamyr kúni Shamalǵan aýylynyń joǵarǵy bóliginde oqys jaǵdai boldy. Paraplanmen ushqan demalýshylar aiaq asty uiytqyp soqqan jelden qurylǵyǵa ie bola almai, jaryq baǵanasyna soǵyldy. Paraplanda bolǵan eki adamnyń biri qazir aýyr jaǵdaida jatyr, ekinshisi jeńil jaraqat alǵan. Osyǵan orai okrýg turǵyndary men qonaqtarynan óz ómirlerińiz ben densaýlyqtaryńyzǵa qaýip tóndirmeýdi suraimyz. Tabiǵat aiasynda seiildeýge shyǵarda aýa raiy boljamyna nazar aýdaryńyzdar» dep jazylǵan áleýmettik jelidegi jazbada.
Almaty oblystyq densaýlyq saqtaý basqarmasynyń baspasóz qyzmeti 1971 jylǵy azamattyń jaǵdaiy aýyr ekenin jetkizdi.
«9 mamyr kúni Qarasai aýdandyq aýrýhanasyna paraplannan qulaǵan eki adam tústi. 1971 jyly týǵan naýqastyń jaǵdaiy aýyr. Jansaqtaý bólimine jatqyzyldy. Birneshe súiegi synǵan. Basynan soqqy alǵan. Al 2004 jylǵy naýqas travmatologiia bóliminde em qabyldap jatyr. Miy shaiqalǵan. Jaǵdaiy ortasha. Omyrtqasy synǵan» delingen vedomstvonyń habarlamasynda.
