Almaty oblysyndaǵy Báiserke aýylynda Kúlimhan Shybyntaeva ózin uly men kelininiń jabylyp soqqyǵa jyqqanyn aityp shaǵymdandy. Aitýynsha, kelini úige kirgizbei, sýyq aýa raiynda dalaǵa qonýǵa májbúrlegen. Osynyń saldarynan keiýananyń ókpesine sýyq tiip, aýyryp qalǵan. Endi qariia 1991 jyly ulyna syiǵa tartqan úidi qaitarýǵa niettenip otyr, dep jazady Sputnik.
Qariianyń atynan baǵdarlamaǵa kómek surap týysy Ásel Muhtarqyzy keldi. Jazdyń sońǵy aiynan beri qariiaǵa bas-kóz bolyp, dári-dármegin alyp berip otyr eken.
"Uiat ta bolsa da bul jerge apamnyń janaiqaiyn jetkizýge kelip otyrmyn. Ol kisiniń basyndaǵy qiyndyqtar kókeiimnen ótip ketti. Osy jyldyń 1 tamyzynan bastap meniń shańyraǵymda turyp jatyr. Árine, mundai jaǵdai bolady dep esh kútken joqpyn. Meniń aldyma toilap, aittap kelsinshi dep oilaityn edim. Biraq mundai jaǵdaimen emes. Kelini men nemeresinen kók ala bolyp soqqy jep alaqanynyń bári aýyryp keldi. Bul maǵan óte aýyr tidi. Ómirimde basymnan kóptegen qiynshylyq ótti. Biraq bul onyń barlyǵynan asyp túsedi. Jalpy apam ózi júretin adam. Biraq, kelini urǵan kezde tilin qatty tistep alǵan. Basynan da urǵan eken. Túrinen shoshyp dárisin alyp berdim. Ol bala emes, úlken kisi", — dedi qariianyń týysy Ásel Muhtarqyzy Qazaqstan arnasynyń "Qareket" baǵdarlamasynda.
Uly men nemeresinen taiaq jegen Kúlimhan Shybyntaeva on qursaq kótergen. Balalarynyń biri qaitys bolǵan.
"Kórgen qorlyǵymdy aityp jetkize almaimyn. Osylardy bir japyraq nanmen baidyń balasyndai etip baqtym. Balalarymnan munsha qorlyq kóremin dep oilamappyn. Shalymnan bir shapalaq jesem armanym joq edi. Ekinshi qyz kelip tamaǵymnan qylqyndyrdy. Tyrnaǵy tamaǵymdy qanatyp jiberdi. Sodan keiin balam qylqyndyrdy. Tamaǵymnyń qyryldap qalǵany sodan. Kelin qulaǵymnan bir qoiyp, keiin bári jara bolyp ketti. Olar jabylyp meni óltiretin shyǵar dep qashtym", — dedi ol.
Ári qarai keiýana kelini men uly úiden qýyp shyqqandyqtan, dalada túneýge májbúr bolǵanyn aitty. Osynyń saldarynan sýyq tiip, aýyryp jatyp qalǵan eken.
"Kelin "Ózi ólip qaldy dep aitamyz" deidi. Eldiń bári esikterin jaýyp alypty, bireýi de meni kirgizbedi. Osynyń saldarynan aǵashtyń túbinde júrip ókpeme sýyq tidi. Aljyǵan túgim de joq. Aljysam osylai sóileimin be?! Laǵyp ketpeimin be?! Úiden bezdirip otyr meni. Shama kelgenshe maǵan osy úidi alyp berińizder. Men odan da úidi jetim balalarǵa bereiin. Osy úige bola syiǵa bergen shapanymdy da satqan edim. Zaýytta jumys istep, mal ósirip alǵan úiim. Balalarymnyń bireýi de habarlaspaidy. Meni qolymdaǵy taiaqpen de urǵan kezderi boldy. Osy balany aidalada qoi baǵyp júrip týǵan edim", — dedi qariia.
Kelini qýyp shyqqan úidi qariia 1991 jyly ulynyń atyna jazdyrǵan.
