الماتى وبلىسىنداعى بەيسەركە اۋىلىندا كٷلٸمحان شىبىنتاەۆا ٶزٸن ۇلى مەن كەلٸنٸنٸڭ جابىلىپ سوققىعا جىققانىن ايتىپ شاعىمداندى. ايتۋىنشا, كەلٸنٸ ٷيگە كٸرگٸزبەي, سۋىق اۋا رايىندا دالاعا قونۋعا مەجبٷرلەگەن. وسىنىڭ سالدارىنان كەيۋانانىڭ ٶكپەسٸنە سۋىق تيٸپ, اۋىرىپ قالعان. ەندٸ قارييا 1991 جىلى ۇلىنا سىيعا تارتقان ٷيدٸ قايتارۋعا نيەتتەنٸپ وتىر, دەپ جازادى Sputnik.
قارييانىڭ اتىنان باعدارلاماعا كٶمەك سۇراپ تۋىسى ەسەل مۇحتارقىزى كەلدٸ. جازدىڭ سوڭعى ايىنان بەرٸ قاريياعا باس-كٶز بولىپ, دەرٸ-دەرمەگٸن الىپ بەرٸپ وتىر ەكەن.
"ۇيات تا بولسا دا بۇل جەرگە اپامنىڭ جانايقايىن جەتكٸزۋگە كەلٸپ وتىرمىن. ول كٸسٸنٸڭ باسىنداعى قيىندىقتار كٶكەيٸمنەن ٶتٸپ كەتتٸ. وسى جىلدىڭ 1 تامىزىنان باستاپ مەنٸڭ شاڭىراعىمدا تۇرىپ جاتىر. ەرينە, مۇنداي جاعداي بولادى دەپ ەش كٷتكەن جوقپىن. مەنٸڭ الدىما تويلاپ, ايتتاپ كەلسٸنشٸ دەپ ويلايتىن ەدٸم. بٸراق مۇنداي جاعدايمەن ەمەس. كەلٸنٸ مەن نەمەرەسٸنەن كٶك الا بولىپ سوققى جەپ الاقانىنىڭ بەرٸ اۋىرىپ كەلدٸ. بۇل ماعان ٶتە اۋىر تيدٸ. ٶمٸرٸمدە باسىمنان كٶپتەگەن قيىنشىلىق ٶتتٸ. بٸراق بۇل ونىڭ بارلىعىنان اسىپ تٷسەدٸ. جالپى اپام ٶزٸ جٷرەتٸن ادام. بٸراق, كەلٸنٸ ۇرعان كەزدە تٸلٸن قاتتى تٸستەپ العان. باسىنان دا ۇرعان ەكەن. تٷرٸنەن شوشىپ دەرٸسٸن الىپ بەردٸم. ول بالا ەمەس, ٷلكەن كٸسٸ", — دەدٸ قارييانىڭ تۋىسى ەسەل مۇحتارقىزى قازاقستان ارناسىنىڭ "قارەكەت" باعدارلاماسىندا.
ۇلى مەن نەمەرەسٸنەن تاياق جەگەن كٷلٸمحان شىبىنتاەۆا ون قۇرساق كٶتەرگەن. بالالارىنىڭ بٸرٸ قايتىس بولعان.
"كٶرگەن قورلىعىمدى ايتىپ جەتكٸزە المايمىن. وسىلاردى بٸر جاپىراق نانمەن بايدىڭ بالاسىنداي ەتٸپ باقتىم. بالالارىمنان مۇنشا قورلىق كٶرەمٸن دەپ ويلاماپپىن. شالىمنان بٸر شاپالاق جەسەم ارمانىم جوق ەدٸ. ەكٸنشٸ قىز كەلٸپ تاماعىمنان قىلقىندىردى. تىرناعى تاماعىمدى قاناتىپ جٸبەردٸ. سودان كەيٸن بالام قىلقىندىردى. تاماعىمنىڭ قىرىلداپ قالعانى سودان. كەلٸن قۇلاعىمنان بٸر قويىپ, كەيٸن بەرٸ جارا بولىپ كەتتٸ. ولار جابىلىپ مەنٸ ٶلتٸرەتٸن شىعار دەپ قاشتىم", — دەدٸ ول.
ەرٸ قاراي كەيۋانا كەلٸنٸ مەن ۇلى ٷيدەن قۋىپ شىققاندىقتان, دالادا تٷنەۋگە مەجبٷر بولعانىن ايتتى. وسىنىڭ سالدارىنان سۋىق تيٸپ, اۋىرىپ جاتىپ قالعان ەكەن.
"كەلٸن "ٶزٸ ٶلٸپ قالدى دەپ ايتامىز" دەيدٸ. ەلدٸڭ بەرٸ ەسٸكتەرٸن جاۋىپ الىپتى, بٸرەۋٸ دە مەنٸ كٸرگٸزبەدٸ. وسىنىڭ سالدارىنان اعاشتىڭ تٷبٸندە جٷرٸپ ٶكپەمە سۋىق تيدٸ. الجىعان تٷگٸم دە جوق. الجىسام وسىلاي سٶيلەيمٸن بە?! لاعىپ كەتپەيمٸن بە?! ٷيدەن بەزدٸرٸپ وتىر مەنٸ. شاما كەلگەنشە ماعان وسى ٷيدٸ الىپ بەرٸڭٸزدەر. مەن ودان دا ٷيدٸ جەتٸم بالالارعا بەرەيٸن. وسى ٷيگە بولا سىيعا بەرگەن شاپانىمدى دا ساتقان ەدٸم. زاۋىتتا جۇمىس ٸستەپ, مال ٶسٸرٸپ العان ٷيٸم. بالالارىمنىڭ بٸرەۋٸ دە حابارلاسپايدى. مەنٸ قولىمداعى تاياقپەن دە ۇرعان كەزدەرٸ بولدى. وسى بالانى ايدالادا قوي باعىپ جٷرٸپ تۋعان ەدٸم", — دەدٸ قارييا.
كەلٸنٸ قۋىپ شىققان ٷيدٸ قارييا 1991 جىلى ۇلىنىڭ اتىنا جازدىرعان.
