Almaty oblysy Qarasai aýdanynda qaiynaǵasy kelinin aiaýsyz sabaǵan. 6 balanyń anasy osy oqiǵadan soń múgedek bolyp qalǵan, dep habarlady "Astana" arnasy.
Jaǵa ustatarlyq jaǵdai Jarmuhanbet aýylynda bolǵan. Jábirlenýshi taraptyń aitýynsha, qaiynaǵasy ulymen birge kelinshekti tepkiniń astyna alǵan. Eń soraqysy, osy sátte úide basqa da adamdar bolǵan. Biraq eshqaisysy kómek qolyn sozbaǵan kórinedi. Aýyr jaraqat alǵan kelinshekke meditsinalyq kómek te jasalmaǵan. Qaryndasynan habar ala almaǵan aǵasy bylyqtyń betin ashqan.
"Keshkisin úiine bardyq. Sóitsek, qaryndasymdy aýyr soqqynyń, tepkiniń astyna alǵan eken. Zorlyq-zombylyqtyń kesirinen eki kún úide jatyp qalǵan. Jedel járdem shaqyrylmaǵan. Ish qurylysyna zaqym kelgen. Qaiyn aǵasy men uly jaýapqa tartylsyn", - deidi jábirlenýshiniń aǵasy Mirlan Syrǵabaev.
Aýyr soqqyǵa jyǵylǵan áielge ota jasalyp, kók baýyry alynyp tastaldy. Múgedek bolyp qalǵan. Advokaty kelinshektiń qaiynaǵasy bostandyqta júrgenin túsene alar emes. Sot sanktsiiasymen 1999 jylǵy uly qamaýǵa alynǵan.
"Biraq onyń ákesin Teltaev Almasty qamaýǵa almaidy. Negizinde bul jerde 120-shy baptyń birinshi bóligimen tirkeý kerek edi. Ekinshiden, urǵany bar, soqqany bar. Úshinshiden, kýágerlerdiń bári aýyr qylmysty kórip turyp, eshqaida habarlamaǵan. Qaiynaǵasy kelinin zorlamaq bolǵan. Qarsylyqqa tap bolǵan soń urǵan", - deidi qorǵaýshy Aiman Omarova.
Bul oqiǵa aýyl halqynyń jaǵasyn ustatty. Olar mundai jaǵdai eldi mekende birinshi ret bolyp otyrǵanyn aitady. Qazirgi tańda kópbalaly ana óz týystarynyń úiinde. "Onyń mektepke baratyn 4 balasy ákesiniń qolynda, biraq jaqyn arada anasyna tapsyrylady", - deidi jergilikti bilik.
"Jarmuhanbet aýylyndaǵy jaǵdai baqylaýǵa alynyp, mektep direktory baryp, qarap turady. Osy aidyń aiaǵyna deiin balalar anasynyń qolyna barady. Ol kisi áleýmettik kómekke tapsyrǵan eken, kúieýi jumys istemegendikten, oǵan otkaz keldi", - deidi Eltai aýyldyq okrýgi ákiminiń orynbasary Birjan Belǵojaev.
Politsiia bul iske qatysty mardymdy jaýap bermedi. "Tergeý júrip jatyr" dep qysqa qaiyrdy.
"Atalǵan fakt QR QK 106-babynyń 1-bóliminde kózdelgen qylmystyq quqyqbuzýshylyq belgileri boiynsha Qarasai aýdanynnyń politsiia basqarmasynda tirkeldi. Qazirgi ýaqytta qylmystyq is boiynsha qajetti tergeý áreketteri júrgizilýde", - deidi Qarasai aýdandyq politsiia basqarmasy basshysynyń orynbasary Aidar Ábdirahmanuly.
Jábir kórgen kópbalaly ana men onyń jaqyndary ádil sheshim bolsa deidi.
