Almaty oblysynda bilim salasyna 80 myń kompiýter satyp alý úshin 12 mlrd 300 million qarjy bólingen. Onyń 8,3 mlrd teńgesi – respýblikalyq, 4 mlrd teńgesi – jergilikti biýdjet qarajaty. Bul jóninde Almaty oblysynyń ákimi Amandyq Batalov Qoǵamdyq keńes ókilderi aldyndaǵy esebinde aitty, dep habarlaidy "Ult aqparat".
2020 jylǵy áleýmettik-ekonomikalyq damý qorytyndylary týraly jiyn onlain formatta ótti. Sharaǵa 100 den asa adam iaǵni, Keńes músheleri men depýtattar, aýdan ákimderi qatysty.
«Oqýshylar men kolledj stýdentteriniń qashyqtan bilim alýyna barlyq jaǵdai jasaldy. 80 myń kompiýter satyp alý úshin 12,3 mlrd teńge qarjy bólindi. 23 myń 700 oqýshyǵa kompiýter ýaqytsha qoldanýǵa taratyldy. Al demeýshiler kómegimen 2110 tehnika berildi», - dedi Amandyq Batalov.
Sondai-aq óńir basshysy shalǵaida turatyn oqýshylardy mektepke jetkizý úshin 1 mlrd teńge somasyna 70 jańa avtobýs satyp alynǵanyn aitty.
Aita keteiik, jalpy Almaty oblysy boiynsha oqýshylardyń sany 426 myńnan asady.
