Almaty oblysyndaǵy sharýa qojalyqtardyń birinen tabylǵan arystan Almaty qalalyq zoobaǵyna jetkizildi. Oǵan Djýma degen at qoiyldy. Bul týraly Ekologiia, geologiia jáne tabiǵi resýrstar ministrligi málim etti, dep habarlaidy "Ult aqparat".
Ekologiia ministrliginiń baspasóz hatshysy Samal Ibraevanyń aitýynsha, arystandy Almaty zoobaǵyna berý máselesi, belsendi azamattardyń arqasynda sheshildi.
«Árine, jabaiy janýarlardyń orny tabiǵatta. Biz olardyń haiýanattar baǵynda bolýyn quptamaimyz, biraq dál osy jaǵdaida basqa amal joq. Almaty zoobaǵy arystandy qabyldady. Sharýa qojalyqtan tabylǵan arystan Simbanyń qaýmalyna ornalastyryldy. Ol úshin Halyqaralyq qar barysy qoryna (Snow Leopard Foundation) alǵys aitamyz. Árine, arystannyń óziniń qorshaýy men tamaǵy bolý kerek. Ol aitarlyqtai qarjyny talap etedi. Osy oraida kómek qolyn sozǵan Sanjar Boqaev pen Rýslan Jemkovke rahmet aitamyn. Bul azamattar arystannyń tamaǵyna kraýdfanding arqyly qarajat jinaý sharasyn uiymdastyrdy. Arystandy tamaqtandyrý úshin kúnine 10-15 keli et qajet. Bul qarajat zoobaǵy janýardy óz balansyna qabyldaǵanǵa deiin qajet bolady, bul kem degende 3-4 aiǵa sozylady», - dedi Samal Ibraeva.
Onyń aitýynsha, Almatydaǵy janýarlardy qorǵaý qorynyń múshesi Natalia Sýljik arystandy qutqarýǵa baryn salǵan. Ol Sanjar Boqaevpen birge Almaty zoobaǵynyń ákimshiligimen shuǵyl túrde kelissózder júrgizip, ornalastyrý máselesin sheshti.
Óz kezeginde Natalia Sýljik Facebook-tegi paraqshasyna zoobaqta túsirilgen videony saldy.
«Arystannyń aty – Djýma. Almaty zoobaǵy arystandy qabyldady. Alaida, bir shart qoidy. Aldaǵy ýaqytta oǵan Simbanyki siiaqty qorshaý salyp berý qajet. Ázirge bizge eski jazǵy qorshaýdy qalpyna keltirýdi usyndy. Kelesi jyldyń qysyna deiin jańa qorshaý qajet bolady», - dep jazady Natalia.
Eske sala ketsek, buǵan deiin Almaty oblysynda sharýa qojalyǵy iesiniń arystan asyrap jatqany anyqtalǵan bolatyn. Almaty oblystyq politsiia departamenti baspasóz qyzmetiniń málimetinshe, 8 aqpan kúni Talǵar aýdanynyń politsiia basqarmasyna habarlama kelip túsken. Ol jerde Besqainar aýdanyndaǵy sharýa qojalyqtyń birinde arystan bar ekeni habarlanǵan. Tártip saqshylary shaǵym boiynsha belgilengen mekenjaidy tekserýge barǵanda aqparat rastalǵan.
