Almatyda 27 qyrkúiekte 15-ret ótken Almaty Marathon qala ekonomikasyna 15,6 mlrd teńge kóleminde úles qosty. Onyń shamamen 3 mlrd teńgesi salyq túsimderine tiesili, dep habarlaidy ult.kz.
Times.kz málimetinshe, marafonǵa 66 elden 16 myń adam qatysty. Onyń 1534-i shetelden, 2238-i Qazaqstannyń ózge óńirlerinen kelgen. Sheteldik qatysýshylardyń eń kóbi Reseiden – 550 adam. Sondai-aq Qyrǵyzstannan 171, Ózbekstannan 151, Qytaidan 133, AQSh pen Ońtústik Koreiadan 51 adamnan qatysty.
Zertteýge sáikes, syrttan kelgen qatysýshylar men olardy ertip kelgender Almaty ekonomikasyna shamamen 5,3 mlrd teńge qaldyrǵan. Bul qarjynyń 3,7 mlrd teńgesi qonaqúi, hostel jáne jaldamaly baspanaǵa, 1,2 mlrd teńgesi bólshek saýdaǵa, 1 mlrd teńgesi kólik pen taksige, 900 mln teńgesi oiyn-saýyq pen ekskýrsiiaǵa, 800 mln teńgesi qoǵamdyq tamaqtanýǵa jumsalǵan.
Bir sheteldik júgirýshi men ony ertip kelgen adamdardyń ortasha shyǵyny 1,82 mln teńgege jetken. Zertteý avtorlarynyń málimetinshe, sheteldik qatysýshylardyń 64 paiyzy marafondy Qazaqstanǵa kelýiniń negizgi sebebi dep ataǵan. Olardyń 87 paiyzy Almatyǵa qaita kelgisi keletinin aitqan.
Biyl jarys baǵyty da ózgertilip, qatysýshylar 42,2 shaqyrymdy bir ainalymmen júgirdi. Marafon Abai alańynan bastalyp, Respýblika alańynda aiaqtaldy.
Jarysqa 2018 jylǵy Boston marafonynyń jeńimpazy, japoniialyq Iýki Kavaýchi de qatysty. Bul onyń Ortalyq Aziiadaǵy alǵashqy marafony boldy.
