Almaty oblysynyń Qarasai aýdanynda respýblikalyq mańyzy bar Almaty – Bishkek avtomobil jolynyń 19–27 shaqyrym aralyǵyn qaita jańǵyrtý jáne keńeitý jumystary bastaldy, dep habarlaidy ult.kz.
Joba Memleket basshysy Qasym-Jomart Toqaevtyń kólik infraqurylymyn damytý jáne avtomobil joldarynyń ótkizý qabiletin arttyrý jónindegi tapsyrmasyn oryndaý aiasynda júzege asyrylýda.
Is-sharaǵa Almaty qalasy ákiminiń birinshi orynbasary Almashan Smatlaev, Almaty oblysy ákimdiginiń, «QazAvtoJol» UK» AQ, Qarasai aýdany ákimdiginiń, merdiger uiymdardyń jáne buqaralyq aqparat quraldarynyń ókilderi qatysty. Jobanyń tehnikalyq parametrlerimen tanysqannan keiin qurylys tehnikasy jer jumystaryna kiristi.
Qaita jańǵyrtylatyn jol ýchaskesi respýblikalyq jol jelisindegi eń qarqyndy qozǵalys júretin baǵyttardyń biri sanalady. Bul jolmen táýligine 70 myńnan astam avtokólik qatynaidy. Qazirgi tórt jolaqty joldyń ótkizý qabileti jetkiliksiz bolǵandyqtan, kólik keptelisi jii týyndap, qozǵalys jyldamdyǵy tómendeidi jáne Almaty qalasy men qala mańyndaǵy eldi mekender arasyndaǵy kólik bailanysyna keri áserin tigizýde.
Joldy keńeitý onyń ótkizý qabiletin arttyryp, jol júrý ýaqytyn qysqartady, sondai-aq júrgizýshiler men jolaýshylar úshin qaýipsiz ári jaily jaǵdai qalyptastyrady.
Joba aiasynda joldyń júris bóligi tórt jolaqtan segiz jolaqqa deiin keńeitiledi. Sonymen qatar, «taǵa» úlgisindegi eki jolairyq, toǵyz jerústi júrginshiler ótkeli salynyp, jol boiyna trotýarlar men zamanaýi syrtqy jaryqtandyrý júiesi ornatylady. Budan bólek, gaz qubyrlary, sýmen jabdyqtaý, elektrmen jabdyqtaý jáne bailanys jelileri qaita jańartylyp, jolǵa jańa kúrdeli úlgidegi jabyn tóseledi. Joba 2026 jyldyń sáýir aiynda memlekettik saraptamanyń oń qorytyndysyn aldy.
Bul jol ýchaskesin jańǵyrtý – Almatynyń kólik júiesin keshendi damytý jumystarynyń bir bóligi. Qazirgi ýaqytta qalada Úlken Almaty ainalma avtomobil jolyna deiin sozylatyn alty radialdy jol men jeti magistraldyq kósheni salý jáne uzartý jumystary jalǵasýda. Sonymen qatar metro, LRT jáne SkyTrain júieleri qatar damytylyp jatyr.
Jobany iske asyrý nátijesinde Almaty qalasyna kireberis jáne shyǵaberis baǵyttardaǵy kólik júktemesin azaitý, jol qozǵalysy qaýipsizdigin arttyrý jáne qala men qala mańyndaǵy eldi mekender arasyndaǵy kólik qatynasyn jaqsartý kózdelip otyr. Sonymen qatar joba Qazaqstan men Qyrǵyzstandy bailanystyratyn halyqaralyq kólik dálizin damytýǵa, saýda-ekonomikalyq bailanystardy nyǵaitýǵa jáne elimizdiń tranzittik áleýetin arttyrýǵa yqpal etedi.
