2026-2027 oqý jylynda elimizdegi 8 myńnan astam mektepte 4,1 mln bala bilim alady. Onyń ishinde 380 myńnan astam bala 1-synypqa barady, dep habarlaidy ult.kz.
QR Oqý-aǵartý ministrliginiń málimetinshe, jańa oqý jyly qarsańynda 62 myń oqýshy ornyna arnalǵan 57 jańa mektep paidalanýǵa berildi. Jańa nysandardyń ashylýy qoldanystaǵy mektepterdiń júktemesin azaityp, balalardyń zamanaýi jaǵdaida bilim alýyna múmkindik beredi.
Jańa mektepterdiń eń kóbi Almaty qalasynda, Batys Qazaqstan, Almaty, Qaraǵandy, Aqtóbe jáne Túrkistan oblystarynda ashyldy. Olarda oqý sabaqtaryn ótkizýge, sportpen shuǵyldanýǵa, sondai-aq oqýshylardyń shyǵarmashylyq jáne tehnikalyq daǵdylaryn damytýǵa qajetti jaǵdailar qarastyrylǵan.
Apatty jáne úsh aýysymdy mektepter máselesin sheshý jumystary da jalǵasýda. Qurylys Arnaýly memlekettik qordyń, Bilim berý infraqurylymyn qoldaý qorynyń, jergilikti biýdjetterdiń qarajaty jáne tartylǵan jeke investitsiialar esebinen júrgizilýde.
Sonymen qatar Memleket basshysy Qasym-Jomart Toqaevtyń tapsyrmasymen 1300 mektepti renovatsiialaý baǵdarlamasy júzege asyrylýda. Baǵdarlama mektep ǵimarattary men materialdyq-tehnikalyq bazany jańartýdy, qaýipsizdik deńgeiin arttyrýdy jáne zamanaýi bilim berý ortasyn qalyptastyrýdy kózdeidi.
