2022 jylǵy qańtardaǵy jappai tártipsizdikter men búlik kezinde bankter men mikroqarjy uiymdaryna keltirilgen shyǵynnyń aldyn ala somasy belgili boldy. Bul týraly Qarjy naryǵyn retteý jáne damytý agenttigi ókili aitty, - dep habarlaidy Tengrinews.kz tilshisi.
Vedomstvo málimetinshe, 18 qańtardaǵy jaǵdai boiynsha aldyn ala esep qorytyndylary ǵana belgili. Bul keibir bankter men uiymdar tonalǵan nysandarǵa kire almaitynyna bailanysty bolyp otyr. Onda politsiia qyzmetkerleri tergeý júrgizip jatyr.
"Búlikshiler men tonaýshylar bankterge keltirgen shyǵynnyń aldyn ala mólsheri 4,1 milliard teńge bolady. Bul soma zalaldyń tolyq qunyn kórsetpeidi, óitkeni keibir bankter zalaldy aldyn ala baǵalaýǵa usyna almaidy. Sebebi olar sol nysandarda júrgizilip jatqan tergeýge bailanysty keńselerge kire almaidy", - dedi agenttik ókili.
Búlikshiler men tonaýshylar eń kóp shyǵyndy, iaǵni jiyntyq somanyń 99 paiyzyn Almaty bankterine keltirgen.
"Keltirilgen shyǵynnyń kóp bóligi urlanǵan jáne búlingen bankomattarǵa tiesili. Olardyń quny 1,6 milliard teńgege baǵalanady. Sondai-aq, 871 million teńge turatyn tehnika joiyldy.
Budan basqa, bank keńseleri qirady, osy tarmaq boiynsha shyǵyn quny 757 million teńge bolady. Búlingen bankomattardan 507 million teńge urlanǵan", - dep tolyqtyrdy agenttik ókili.
Sonymen qatar, vedomstvo ókili mikroqarjy uiymdaryna keltirilgen ziiannyń aldyn ala mólsherin usyndy.
"Ol shamamen 653 million teńge bolady. Onyń 384 million teńgesi MQU-nyń Almatydaǵy filialdaryna tiesili. Sondai-aq, Almaty oblysynda 140 million teńgege jáne Qostanai oblysynda 101 million teńgege uiym múlikteri zardap shekti", - dep qorytyndylady ol.
