Almaty halyqaralyq áýejaiynyń ishki reister terminalyn qaita jańartý jumystary júrgizilip jatyr. Qala ákimi Darhan Satybaldy jumys barysymen tanysty, dep habarlaidy ult.kz.
Jańǵyrtý terminaldyń barlyq bóligin qamtidy. Atap aitqanda, eden men tóbe jabyndary, jeldetý jáne elektrmen jabdyqtaý júieleri, jolaýshylardy tirkeý jáne bagaj qabyldaý aimaqtary jańartylýda.
Ákim qaita jańartylyp jatqan ushaqqa otyrǵyzý zalyn, balalar alańyn jáne jańa qoǵamdyq tamaqtaný orny ornalasatyn terrasany aralap kórdi. Sonymen qatar geitterdi jalǵaityn jańa kópirdiń jobasymen tanysty.
Negizgi jumystardy qyrkúiek aiynyń sońyna deiin aiaqtaý josparlanǵan. Odan keiin ishki jáne halyqaralyq terminaldardy bailanystyratyn dálizdi abattandyrý jumystary júrgiziledi. Bul kezeńdi qazan-qarasha ailarynda aiaqtaý kózdelip otyr.
Budan bólek, Darhan Satybaldy áýejaidyń jańa kireberis bóliginiń qurylys barysyn tekserdi.
Ákim jaýapty tulǵalarǵa sapa talaptaryn qatań saqtai otyryp, jumys qarqynyn arttyrýdy tapsyrdy.
