8 sáýirde ótken qoǵamdyq keńes otyrysynda Almaty ákimi "sarapshylar pikirin tolyq zerdelep, jobany damyta túsý úshin" "Kókjailaý" kýrortynyń qurylysyn keiinge shegerýdi usyndy, dep habarlaidy "Ult aqparat" Baýyrjan Baibektiń Týitterdegi jazbasyna silteme jasap.
"Asyǵýdyń qajeti joq dep oilaimyn. Sarapshylar pikiriniń bárin eskerip, jańa oryndar qarastyrýymyz kerek. "Kókjailaý" jobasyn damytyp, keiinge qaldyrýdy usynamyn. Onyń ústine, mamandardyń pikirinshe, endigi bar kýrorttardy damytýǵa az degende úsh-bes jyl kerek. Osy ýaqyt ishinde tájiribe jinap, maman daiyndap, turǵyndar men kýrort qonaqtarynyń pikirin zerdeleimiz. Osydan soń ǵana "Kókjailaý" taý-shańǵy kýrortynyń qurylysyna kirise alamyz" deidi Baýyrjan Baibek.
Biyl kúzde Almaty qalasy ákimdigi bastapqy jobany qaita qarap, yqtimal qurylys aýmaǵyn 14 ese qysqartqan. Biraq qoǵam ókilderi bilik josparymen áli de kelispeidi. Olardyń aitýynsha, qonaqúi, kafe, infraqurylym nysandaryn salý taýdyń ekologiialyq júiesine úlken ziian keltirmek.
Almatyǵa jaqyn "Medeý" muz aidynynan tórt kilometr qashyqtyqta ornalasqan shatqalǵa kýrort salý jobasy 2002 jyly kóterilgen. Almaty biligi onyń taý ekojúiesine ziian keltirmeitinin aitady. Qalalyq ákimdiktiń pikirinshe, joba týrizmdi damytý úshin óte mańyzdy.
Kókjailaýǵa kýrort salýǵa qarsy qoǵamdyq ekologtardyń shaǵymy boiynsha sotta bes is qaraldy. Prokýratýraǵa jiyrmadan astam aryz tústi.
2017 jyly Orhýs konventsiiasyn saqtaý máseleleri jónindegi komitet Qazaqstannyń jobany talqylaýǵa qoǵam ókilderin qatystyrý isinde Konventsiia talaptary men jergilikti zańnamany saqtamaǵan dep tapqan.
