Beineden alynǵan kadr / 24.kz
Aqtóbede Jeńis kúni qarsańynda el júregin tolqytqan tyń derek kópshilikke usynyldy. Áliia Moldaǵulovanyń soǵysqa attanar aldynda jazǵan buryn belgisiz bolyp kelgen haty alǵash ret jurt nazaryna usynyldy, dep habarlaidy Ult.kz 24.kz-ke silteme jasap.
Qundy jádigerdi Áliia Moldaǵulova atyndaǵy oblystyq memorialdyq mýzei qorynan kórýge bolady. Batyr qyz bul hatty bala kúngi dosy Olegke arnap jazǵan. Onda ol mergender mektebinde bilim alyp júrgenin jáne Otan qorǵaýǵa attanýǵa degen zor yqylasyn erekshe qýanyshpen jetkizedi.
Mýzei qorynda buǵan deiin qaharmannyń jeti hatynyń kóshirmesi saqtalǵan bolsa, segizinshi hat memlekettik arhivten tabylyp, ǵylymi ainalymǵa engizildi. Bul jádiger belgili jýrnalist, derekti filmder stsenarisi Seiilhan Asqarovtyń jeke muraǵatynan alynǵan.
Hat mazmunynda Áliianyń qaisar minezi aiqyn seziledi. Áskeri komissariatqa birneshe ret jasy jetpegenine qaramastan qaita-qaita baryp, aqyry armanyna jetkenin jazady. Sonymen qatar ol Arkadii Gaidarnyń sózderinen shabyt alǵanyn da atap ótedi. Bul onyń rýhani álemi men maqsatkerligin aiqyndai túsedi.
Tarihshylardyń aitýynsha, bul hat shamamen 1943 jyly, Áliia mergender mektebin úzdik aiaqtaǵan kezeńde jazylǵan. Kóp uzamai ol maidanǵa attanyp, 54-shi arnaiy atqyshtar brigadasy quramynda erlikpen shaiqasady.
Hat joldarynda týǵan jerge degen saǵynysh, dostyqqa adaldyq jáne Otan aldyndaǵy boryshqa degen beriktik aiqyn ańǵarylady. Batyr qyz óz oiyn nebári birneshe sóilemmen jetkizse de, onyń árbir joly – tutas bir dáýirdiń úni ispetti.
Kórmede sondai-aq aqyn Abai Qunanbaiulynyń óleń joldary da usynylǵan. Bul óleń arqyly batyrdyń ómirlik ustanymy men rýhani biigi kórinis tabady.
Aita keteiik, mýzeide ashylǵan arnaiy kórmede Ekinshi dúniejúzilik soǵysqa qatysqan 40-tan astam aqtóbelik jaýyngerdiń fotosýretteri, marapattary men jeke zattary qoiylǵan. Kórme kelýshilerge tek tarihi derek emes, el úshin janyn qiǵan erlerdiń ór rýhyn sezinýge múmkindik beredi.
