«Astana EKSPO 2017» Ulttyq kompaniiasy Basqarma Tóraǵasynyń birinshi orynbasary Álisher Pirmetov Atameken business channel tilshisine bergen suhbatynda halyqaralyq mamandyrylǵan kórmeniń nátijeleri men onyń Qazaqstan hám el seriktesteriniń damýyna ekonomikalyq áseri týraly, odan bólek EXPO-2017 kórmesiniń ekonomikanyń bútin salasyna tigizgen paidasy haqynda aityp, óz oi-pikirimen bólisken, dep jazady "Ult aqparat".
Onyń sózinshe, aitýly shara elimiz ben onyń astanasynyń týristik áleýetin aitarlyqtai damytyp, jańa belesterge shyǵardy.
«Sózsiz, kelýshiler sanynyń kóptigi - negizgi kórsetkishterdiń biri. Óitkeni qai kórme bolsyn qonaq úshin qyzmet jasaidy. Onyń ishinde - bizdiki de. Iaǵni olardyń sany men kórilim sany - eki basty kórsetkish. «Astana EKSPO» nátijeleri barlyq boljam men úmitti aqtady. Tirkeý qujattamasy boiynsha biz eki millionnan astam qonaq kútkenbiz, al kórmege tórt millionǵa jýyq adam keldi. Onyń jarty milliony - 187 elden kelgen týrister. Obektilerdi kórý jáne aralaý kórsetkishteri boiynsha da nátije tańqalarlyq. Josparlaǵan bes million kórilimniń ornyna 33 million. Eń kóp qaralǵan pavilon - "Nur Álem". Ol Qazaqstan men Astananyń betke ustar jerine, maqtanyshy men birinshi týristik aýmaǵyna ainaldy.
Ekinshiden, biz úshin elordalyq biznesmenderden kelgen hat kútpegen jaǵdai boldy. Olar kórme ýaqytyn soza turýdy ótindi. Árine, olardyń ótinishin oryndaýǵa bolatyn edi. Degenmen kórmelerdiń Halyqaralyq biýrosynyń reglamenti men qatysýshy elder biýdjetiniń esebine bailanysty ondai qadamǵa bara almadyq. Biraq biznestiń mundai reaktsiiasynyń ózi - úlken jetistik. Kórmege deiingi negizgi daiyndyq kezeńinde, iaǵni Ahmetjan Esimovtyń tóraǵalyqqa kelgen tusynan el boiynsha on myńdaǵan jumys oryndary ashyldy. Biz árine ishki jáne kirme-týrizmge kópten kútken serpilis syilaimyz dep oiladyq. Al, asylynda elordadaǵy týristik biznestiń mundai ósimi men órkendeýin esh kútken joqpyz», - deidi ol sózinde.
Odan bólek, Álisher Habibollauly "Ekspo"-nyń mindeti - múmkindikter jasaý ekenin taǵy bir eske túsirýdi jón sanaǵan.
"Qalǵan aimaqtarda da ósim bar dep oilaimyz. Menińshe, ol jyl sońynda, qorytyndy statistikalar jasalǵan tusta belgili bolady dep boljaimyn. Sosyn, taǵy bir másele, biz Ahmetjan Smaǵululy aitqandai, "EKSPO"-nyń mindeti - múmkindikter jasaý ekenin uǵýymyz kerek. Olardy qoldaný-qoldanbaý - ózge memlekettik qurylymdar men jergilikti bilik organdarynyń qabilettiligi men jumys júieligine bailanysty. Óz basym, Astana ákimdigi bul múmkindikterdi tolyq qoldandy dep esepteimin.
Mysaly biz Astananyń týristik biznesinde óz jetistigimizdi kórip otyrmyz. Ony dál sol týrkompaniialardyń jergilikti týristerdi deldal retinde Túrkiia men Egipetke jiberýden artyq paida ákeletin ishki jáne kirme-týrizmniń bar ekenin uqqanynan baiqaýǵa bolady. Endi olar el ekonomikasyna qatar paida túsiretin sol naryq úshin tartysýǵa bolatynyn túsindi.
Úshinshiden, daiyndyq barysyndaǵy 50 myń jańa jáne saqtalǵan jumys orny men kórmeniń ótý kezeńindegi 20 myń jumys orny da - jetistik. Maǵan dál osyndai jetistikterimen maqtana alatyn bir memlekettik baǵdarlama kórsetińizshi.
Tórtinshiden, álem boiynsha mediia men jarnama arqyly 2,6 milliard adam "kórme keńistigine" enip, syrttai da bolsa kórip-bildi. Al, besinshiden, eń bastysy, biz salystyrmaly túrde shaǵyn ǵana aýdanda álemniń túkpir-túkpirinen jinaqtalǵan 193 ozyq tehnologiianyń jetistigin pash ettik jáne sol arqyly qazaqstandyqtarǵa "álem aldaǵy ýaqyttarda osylai ómir súretin bolsa, biz qalai ómir súremiz?" degen saýal tóńireginde oilanýǵa múmkindik jasadyq. Menińshe, "EKSPO"-dan keiingi ásermen on shaqty ortaqol tehnologiia kompaniia qurylatyn bolsa, bunyń ózi úlken jetistik bolmaq", - deidi ol tilshige bergen jaýabynda.
Sóz sońynda tóraǵa orynbasary EKSPO áseriniń áli de saqtalǵanyn jáne aldaǵy birneshe jylǵa deiin jalǵasatynyn aitady.
