«Álippe» oqýlyǵy oqýshynyń jas ereksheligine bailanysty jazyldy. Bul týraly QR Bilim jáne ǵylym vitse-ministri Sholpan Karinova málim etti, dep habarlaidy QazAqparat.
«Jaz kezinde «Álippe» oqýlyǵyna bailanysty ózgerister memlekettik standartqa engizilgenin habarlaǵan edik. Qazirgi kezde «Álippe» oqý baǵdarlamasyn jasaýdyń jumysy aiaqtalyp, bekitildi. «Álippeni» engizýdiń, qaitarýdyń mańyzy zor ekenin atap ótkim keledi. Sebebi «Álippe» alǵashqy oqýlyq bolsa, ol mindetti túrde oqýshynyń jas ereksheligine, fiziologiialyq ereksheligine bailanysty sai bolýy kerek. Balalar mektepke 6 jastan qabyldanady. Osy oraida jumys toby aýqymdy sharalardy atqardy», - dep toqtaldy Sh. Karinova Ortalyq kommýnikatsiialar qyzmetinde.
Onyń aitýynsha, 20-dan astam jumys tobynyń otyrysy ótkizildi.
«Bul turǵyda ǵylymi negizge, tájiribelik qoldanysqa qatysty birneshe usynys kelip tústi. Sonyń barlyǵy zerdelenip, naqty avtorlardyń qatysýymen jumys toby ózine tiesili sharalardy atqardy», - vitse-ministr.
Óz kezeginde Y. Altynsarin atyndaǵy Ulttyq bilim akademiiasynyń orta bilim ortalyǵynyń direktory Manara Adamova jańartylǵan bilim mazmuny 2016 jyldan engizilgennen beri, elimizde birinshi synyptan «Saýat ashý» oqýlyǵy paidalanylyp kelgenin eske saldy.
«Ata-analar tarapynan «Álippeni» izdegender kóp boldy. «Saýat ashý» men «Álippeniń» aiyrmashylyǵyna toqtalsaq, «Álippe» men «Ana tili» oqýlyqtary «Saýat ashýdyń» ishine kiriktirilgen bolatyn. Endi qazir ázirlenip jatqan oqý baǵdarlamasyna sáikes shyǵarylatyn «Álippe» oqýlyǵy men «Ana tili» bólek bolady. 2021-2022 oqý jylynan bastap eki oqýlyqpen birinshi synyp balalary bilim alady», - dedi ortalyq direktory.
Onyń sózine qaraǵanda, «Álippe» 96-98 saǵat kóleminde birinshi jartjyldyqta oqytylady. «Álippege deiingi» kezeńge 2 apta ýaqyt bólinedi. Odan keiin «Álippe» oqýlyǵy boiynsha oqytý jalǵastyrylady.
«Qańtar aiynan bastap, iaǵni úshinshi toqsanǵa kóshken kezeńnen oqý men jazýdy jetildirý úshin «Ana tili» oqýlyǵynyń aiasynda oqytý jalǵastyrylady», - dedi M. Adamova.
Budan buryn habarlanǵandai, «Álippeni» engizý 2021-2022 jylǵa josparlanǵan.
Biyl tamyz aiynda QR Bilim jáne ǵylym ministri Ashat Aimaǵambetov ózgeristiń aiasynda mektep baǵdarlamasyna sáikes, 1-synyptarǵa 1-2 toqsan «Álippe», 3-4 toqsan «Ana tili» engiziletinin aitqan edi.
