Bir ailyǵynan amerikalyq otbasynda tárbielense de qazaq ekenin maqtan tutyp, elge kelýdi armandap júrgen Rústemniń hikaiasy taǵy bir qazaqtyń taǵdyryn esime túsirdi.
1985 jyl. Aspirantpyn. Qosymsha tabys úshin Asqar esimdi azamat ekeýimiz túnde Máskeýdiń 1905 jyl kóshesindegi tramvai deposynda jumys jasaimyz. Nikolai degen túri qazaqqa uqsas egde brigadir bir kúni bizden qazaqsha sóilesýimizdi ótindi. Biz sóilese bastaǵanda kózi jasaýrap, kóńili buzylyp, burylyp ketti. Keiin óz taǵdyryn baiandap berdi. Ol qazaq eken.
Asharshylyq zardabynan 2-3 jasar balany anasy Máskeýge bara jatqan otarbadaǵy bireýlerge tabystaǵan dep oilaitynyn aitty. Solai dep ózi tárbielengen balalar úiindegiler aitsa kerek. Bar biletini qazaq ekendigi jáne Qostanai ataýy. Ol týǵan jeri me, ne otarba aialdaǵan jer me, odan beihabar. Zaty qazaq bolǵanymen taza orys-keńes mádenietiniń ókili bolyp tárbielengen. Ishtei Qazaqstandy kórýdi armandaǵanmen, ony júzege asyrýǵa júreksinedi eken. Otbasy da quptamasa kerek. Barǵanymen eshkimdi bilmeitinin aityp, kóńili qulazydy.
Kelesi túni Nikolai qazaqsha án aitýymyzdy ótindi. Án aitylǵanda kózinen jas parlap qoia berdi. Keiin aýysymdarymyz týra kelgen saiyn bizge án salǵyzatyn boldy. Nikolai bizge aǵalyq qamqorlyq jasap, jataqhanadaǵy dostarymyzǵa ashanadan sálemdeme jiberip turdy. Túngi jumysty doǵaryp, qoshtasýǵa kelgenimizde: "Men endi ǵana qazaqtyń janyn túsine bastadym. Ásirese qazaqtyń ánderi qatty áser etti. Senderge rahmet. Maýqymdy basqandai boldym. Eldi bir kórip qaitýǵa bel býdym"- dep, bizge batasyn berdi.
Álihan Baimenovtyń feisbýktegi jazbasynan
