Halyqtyń ál-aýqatyn jaqsartýǵa kedergi keltiretin negizgi sebepterdi joiý 4 baǵytta júrgiziledi. Bul týraly Úkimet otyrysynda QR Ulttyq ekonomika ministri Álibek Qýantyrov aitty, dep habarlaidy QazAqparat.
Onyń atap ótýinshe, Prezidenttiń halyqtyń tabysyn arttyrý baǵdarlamasyn ázirleý jónindegi tapsyrmasyn oryndaý aiasynda eńbek naryǵyna, ómir súrý deńgeii men kedeilik kórsetkishterine, halyqtyń kiristeri men shyǵystarynyń qurylymyna taldaý júrgizildi. Taldaý nátijeleri boiynsha halyqtyń ál-aýqatyn jaqsartýǵa kedergi keltiretin negizgi sebepter anyqtaldy.
«Anyqtalǵan máselelerdi joiý maqsatynda baǵdarlama 4 baǵyt boiynsha mynadai keshendi is-sharalardy iske asyrýǵa baǵyttalatyn bolady: halyqtyń eńbek qyzmetinen túsetin tabystaryn arttyrý; kásipkerlik qyzmetten túsetin tabystardy arttyrý; joǵary ónimdi jumys oryndaryn qurý; jumys kúshiniń daǵdylaryn arttyrý. Halyqtyń tabysyn arttyrý baǵdarlamasyn ázirleý aiasynda ár túrli deldaldar men monopoliialyq operatorlardyń komissiialary men tarifterin tóleý boiynsha halyqtyń qosymsha shyǵystaryn qysqartý jónindegi sharalar pysyqtalýda. Búgingi kúni Úkimet kirme joldardy usyný qyzmetteri boiynsha tarifterdi tómendetý baǵytynda jedel sharalar qabyldady. Osylaisha, kirme joldardyń iri teńgerim ustaýshysy bolyp tabylatyn «Kóliktik servis ortalyǵy» AQ úshin tarifter 92 paiyzǵa tómendedi», - dedi ministr.
Sondai-aq, Álibek Qýantyrovtyń aitýynsha, Pavlodar oblysynda kirme joldardy usyný qyzmetterin kórsetetin «Arman Kala Limited» JShS úshin tarifter 93 paiyz azaityldy. Atalǵan is-shara «Bogatyr kómir» JShS óndiretin kómirdiń qunyna júktemeni azaitýǵa múmkindik beredi.
«Budan basqa, osy jyldyń 1 aqpanynan bastap elimizdiń birqatar óńirlerinde kirme joldardy usyný qyzmetterin júzege asyratyn 21 sýbektige tarifter orta eseppen 80 paiyzǵa tómendedi. Bul is-shara energetikalyq kómir qunyna jáne áleýmettik mańyzy bar taýarlar baǵasyna teris áserdi boldyrmaýǵa múmkindik beredi», - dedi ol.
