Búgingi tańda búkil álem boiynsha 300 million adam depressiiaǵa, 260 million adam kúizeliske shaldyqqan. Mamandar psihikalyq aýrýlardyń kóp taralýyna tehnologiialardyń áseri zor ekenin jarysa aityp jatyr. Osy rette The Economist basylymy «Notes on a Nervous Planet» (Ashýly planeta týraly jazbalar), «Reasons to Stay Alive» (Tiri qalýdyń sebepteri) kitaptarynyń avtory Mett Heigpen kólemdi suhbat jariialaǵan eken.
Basylymnyń «Qoǵamda depressiia men kúizelistiń kóbeiýinde tehnologiialardyń róli qandai?» atty suraǵyna jaýap bere otyryp, Heig búgingi tańda adamzattyń kóp ózgeristi bastan keshkenin jazady.
«Adamdar basqasha ómir súredi, bir-birimen tildesý amaldary da ózgergen. Osy ózgeristerdiń barlyǵyn tehnologiialar alyp keldi. Sol sebepti áleýmettik media kompaniialar ózderine artylǵan jaýapkershilikti sezinýi kerek. Jalpy, tehnologiianyń ózi problema emes, biraq biz onyń ómirimiz ben aqyl-oiymyzǵa áseri týraly kóp bilmeimiz. Mine, sol problema», - deidi Heig.
Onyń aitýynsha, kóbinese 16 men 24 jas aralyǵyndaǵy jastar jii jalǵyzsyraidy jáne áleýmettik jelige kóbirek táýeldi bolady. Al áleýmettik jeli óz kezeginde jalǵyzdyq sezimin odan saiyn kúsheite túsedi.
«Árbir áleýmettik jeli adamǵa ártúrli áser etip, ártúrli problema týǵyzady. Mysaly, Twitter trolling pen saiasattyń poliarizatsiiasyna mán beredi. Instagram adamnyń ózin-ózi baǵalaýyn tómendetip, ózin basqa adamdarmen salystyrýyna alyp keledi. Sonymen qatar, óz ózine degen senimdilikti joiady. Snapchat jasóspirimder úshin qaýipti. Sebebi, olardyń arasynda onlain kemsitý jii bolady», - deidi Heig.
Suhbat barysynda búgingi tańda psihikalyq densaýlyq daǵdarysy júrip jatqany aitylady. Al osy salada birneshe kitap jazǵan avtor qoǵamnyń durys baǵytta damymai otyrǵanyn da alǵa tartady.
«Bul problemany sheshý úshin jastarmen jumys isteý kerek. Adamnyń psihikasynyń buzylýy kóp jaǵdaida 14 jasqa deiin paida bolady eken. Sol sebepti olardyń áleýmettik jelimen durys jumys isteýine mán berip, barynsha baqylaǵan jón», - deidi maman.
