Qyzylorda oblysynda tótenshe jaǵdai saldarynan jumysyn ýaqytsha toqtatqan birqatar kásipkerler 42500 teńge áleýmettik tólemge qol jetkizdi, dep habarlaidy QazAqparat.
Olardyń qatarynda Qyzylorda qalasynda mektepterde ashanany tamaq ónimderimen qamtamasyz etetin kásipker Roza Qadylkurmanova da bar. Kásipker oblys ortalyǵyndaǵy №43, 136 mektepterde atalǵan jumyspen ainalysatyn.
«Tótennen kelgen qaýipti indet barlyq salaǵa keri áserin tigizdi. Elimizdegi, óńirdegi karantin kezinde bizdiń de tynys-tirshiligimiz toqtap qaldy. Bul sátte memleket tarapynan tabyssyz qalǵan qazaqstandyqtarǵa qoldaý kórsetilýi zor qamqorlyq dep túsinemin. Men jáne ózimmen birge jumys jasaityn ujym músheleri de atalǵan tólemge qol jetkizdi. Osy oraida Memleket basshysyna, Úkimetke, barlyq janashyr azamattarǵa alǵys bildiremin. Elimiz bul qiyndyqty tezirek jeńip shyǵady dep senemin», - dedi kásipker.
Qyzylordalyq taǵy bir kásipker Gaýhar Qalymbetova da memleket tarapynan kórsetilgen qamqorlyqqa dán riza ekenin jetkizdi. Ol vizajist kásibimen ainalysatyn edi. Qazir ol jumysy toqtap tur.
«Qiyndyq eshkimge de ońai soǵyp jatqan joq. Tabyssyz qalǵan azamattarǵa memleket tarapynan tiisti qoldaý jasaldy. Osy oraida halyqqa berilgen tólem kóp otbasynyń muń-muqtajyn sheshýge oń septigin tigizdi. Aldaǵy jarqyn kúnderde elimizde kóptegen igilikti isterge jol ashylady degen úmittemin. Elimiz damyp, órkendei bersin», - dedi ol.
Tótenshe jaǵdaida muqtaj azamattarǵa kórsetiletin áleýmettik qoldaý negizinde 98 myńnan astam azamatqa tólem túsken.
.jpeg)