Búgin QR Parlamenti Senatynyń jalpy otyrysynda «2019-2021 jyldarǵa arnalǵan respýblikalyq biýdjet týraly» QR Zańyna ózgerister engizý týraly» Zańy qabyldandy, dep habarlaidy QazAqparat.
Naqtylaýdyń negizgi mindetteri - áleýmettik salada shuǵyl qarjylandyrylatyn jekelegen máselelerdi sheshý, keiingi jyldarda ekonomikanyń ósýi úshin qosymsha kózder jasaý jáne 2019 jyldyń sońyna deiin Úkimettiń kezek kúttirmeitin mindetterge arnalǵan rezerviniń aqylǵa qonymdy deńgeiin qamtamasyz etý.
«Zań jobasy 2019 jylǵa arnalǵan eldiń áleýmettik-ekonomikalyq damý boljamynyń kórsetkishteri saqtala otyryp, qalyptastyryldy. Respýblikalyq biýdjettiń túsimderi 94,9 mlrd teńgege ulǵaityldy. Respýblikalyq biýdjet shyǵystarynyń kólemi 94,9 mlrd teńgege ulǵaityldy. Respýblikalyq biýdjettiń tapshylyǵy buryn bekitilgen jalpy ishki ónimniń 2,1 paiyzy deńgeiinde saqtaldy», - dedi QR Premer-Ministriniń birinshi orynbasary-Qarjy ministri Álihan Smaiylov.
Atap aitqanda, áleýmettik saladaǵy shuǵyl qarjylandyrý máselelerin sheshý maqsatynda áleýmettik bloktyń shyǵystary 6,7 mlrd teńgege ulǵaityldy. Shyǵystardy qaita bólýdi eskere otyryp, qosymsha qarajat ataýly áleýmettik kómekti tóleýge, meditsinalyq kómek kórsetýge jáne densaýlyq saqtaý nysandarynyń qurylysyn jalǵastyrýǵa baǵyttaldy.
Sonymen qatar, naqty sektordyń shyǵystary 15,6 mlrd teńgege ósti. Biýdjettik baǵdarlamalar ákimshileri usynǵan qarajatty qaita bólýdi eskere otyryp, ónerkásipti qoldaýǵa, «Qazaqstan turǵyn úi qurylys jinaq bankiniń» salymshylaryna turǵyn úi qaryzdaryn berýge qosymsha shyǵystar kózdeldi.
«Zań jobasyn daiyndaý kezinde jekelegen memlekettik organdardy qaita uiymdastyrýyn eskere otyryp, shyǵystardy túzetý qamtylǵan. Munymen qosa, azamattyq qyzmetshilerdiń eńbekaqysyn arttyrýǵa, jylý energetikasy men kólik infraqurylymyn damytýǵa, «Nurly jer» baǵdarlamasy sheńberinde turǵyn úi jáne injenerlik-kommýnikatsiialyq infraqurylym salýǵa naqty qajettiligin eskere otyryp, óńirler arasynda qarajat qaita bólý eskerilgen», - dedi Á. Smaiylov.
Óz kezeginde QR Ulttyq ekonomika ministri Rýslan Dálenov 2019 jylǵa arnalǵan respýblikalyq biýdjetti naqtylaý kezinde eldiń áleýmettik-ekonomikalyq damý boljamynyń negizgi kórsetkishteri saqtalǵanyn quptady.
«Jalpy ishki ónimniń ósýi 3,8 paiyz deńgeiinde, munai óndirý 89 mln tonna kóleminde. Munaidyń álemdik baǵasy joǵary qubylmalylyqty kórsetip otyr. Osyny eskere otyryp, munaidyń boljamdy baǵasy barreline 55 AQSh dollary deńgeiinde saqtaldy», - dedi ministr.
Onyń atap ótýinshe, jyldyq infliatsiianyń nysanaly dálizi 4-6 paiyz sheginde tur.
«Jalpy, respýblikalyq biýdjettiń kiristeri (transfertterdi esepke almaǵanda) 2019 jyly 7 trln 81 mlrd teńgeni quraidy. Túsimder túrleri boiynsha kirister qurylymy saqtalady. Kólemdi túsimderdi qosylǵan qun salyǵy (2,8 trln teńge), korporativtik tabys salyǵy (2 trln teńge), halyqaralyq saýdaǵa salynatyn salyqtar (1,5 trln teńge) qamtydy», - dedi Rýslan Dálenov.
Túsimderdiń jalpy kólemi 95 mlrd teńgege ósip, 10,7 trln teńgeni quramaq. Transfertterdiń túsimderi, onyń ishinde Ulttyq qordan transfertter óspeidi. Shyǵystar 95 mlrd teńgege artady, bul kiristerdiń ósýimen sáikes keledi. Respýblikalyq biýdjet shyǵystarynyń kólemi 12 trln teńgeden asady.
.jpeg)