Búginde Audi ataýyn bilmeitin adam az. Tórt saqinasy bar áigili nemis brendi álemdegi eń tanymal premiým avtokólik óndirýshileriniń qataryna kiredi. Alaida Audi markasynyń ataýy uzaqqa sozylǵan marketingtik zertteýdiń nemese iri jarnama agenttiginiń jumysynyń nátijesinde paida bolmaǵan. Álemge áigili kólik brendiniń ataýyn nebári 10 jastaǵy bala usynǵan, dep habarlaidy ult.kz.
Audi kompaniiasynyń resmi tarihynda bul ideianyń nemis kásipkeri Frants Fikentsherdiń uly Genrih Fikentsherge tiesili ekeni aitylady. Ol úlkenderdiń jańa avtomobil kompaniiasyna at izdep otyrǵan áńgimesin estip, máseleniń qarapaiym sheshimin usynǵan.
Audi kompaniiasynyń negizin qalaǵan kim?
Audi tarihy nemis injeneri Aýgýst Horhtyń esimimen tikelei bailanysty. Ol avtomobil óndirisiniń alǵashqy kezeńinde eńbek etken tanymal injenerlerdiń biri edi.
Aýgýst Horh Saksoniiadaǵy Mitvaida tehnikalyq akademiiasyn aiaqtaǵannan keiin qozǵaltqysh jasaý salasynda jumys istedi. Keiin Mangeim qalasyndaǵy Karl Bents kompaniiasynda avtomobil óndirisi boiynsha basshylyq qyzmet atqardy.
1899 jylǵy 14 qarashada injener Keln qalasynda A. Horch & Cie. atty alǵashqy kompaniiasyn qurdy. Al 1900 jyly onyń alǵashqy avtokóligi jasaldy. Eki tsilindrli qozǵaltqyshpen jabdyqtalǵan Horch No. 1 kóligi saǵatyna shamamen 30–32 shaqyrym jyldamdyqpen júre alǵan.
Keiin kásiporyn Saksoniiadaǵy Raihenbah qalasyna, odan soń Tsvikkaýǵa kóshirildi. Alaida kompaniia basshylyǵy men Aýgýst Horh arasynda kelispeýshilik týyndap, injener 1909 jyly ózi qurǵan kásiporynnan ketýge májbúr boldy.
Nelikten Aýgýst Horh óz tegin qaita paidalana almady?
Óz kompaniiasynan ketken Aýgýst Horh avtomobil jasaýdan bas tartpady. Ol 1909 jyly Tsvikkaý qalasynda jańa kólik kásipornyn qurdy.
Injener jańa kompaniiasyna qaitadan óz tegin bergisi kelgen. Biraq «Horch» ataýy burynǵy kásiporynnyń tirkelgen saýda belgisi bolyp sanaldy. Sondyqtan Aýgýst Horhqa óz tegin jańa avtomobil markasynyń ataýy retinde paidalanýǵa zań júzinde ruqsat berilmedi.
Osydan keiin kásipker men onyń seriktesteri jańa kompaniiaǵa ataý izdei bastady. Talqylaý Aýgýst Horhtyń dosy ári isker seriktesi Frants Fikentsherdiń úiinde ótken.
Audi ataýyn 10 jastaǵy bala qalai oilap tapty?
Eresekter jańa kompaniianyń ataýyn talqylap otyrǵanda, bólmede Frants Fikentsherdiń 10 jastaǵy uly Genrih te bolǵan. Kei derekte onyń sol ýaqytta latyn tilinen úi tapsyrmasyn oryndap otyrǵany aitylady.
Nemis tilindegi «Horch!» sózi qazaqsha «tyńda!» nemese «qulaq sal!» degen maǵyna beredi. Genrih osy sózdi latyn tiline aýdarýdy usynady. «Tyńda!» sóziniń latyn tilindegi buiryq rai nusqasy – «Audi!».
Balanyń usynysy jinalǵandarǵa unap, jańa avtomobil kompaniiasy Audi dep ataldy. Audi kompaniiasynyń resmi muraǵatyndaǵy málimet boiynsha, brend ataýyn usynǵan Genrih Fikentsher sol kezde nebári 10 jasta bolǵan.
Osylaisha Aýgýst Horh óziniń tegin tikelei paidalana almasa da, onyń latyn tilindegi balamasyn jańa kompaniianyń ataýyna ainaldyrdy. Iaǵni Horch jáne Audi sózderiniń maǵynasy birdei.
Alǵashqy Audi kóligi qashan shyǵaryldy?
Audi ataýyn ielengen alǵashqy avtomobil 1910 jylǵy mamyrda shyǵaryldy. Kóp uzamai jańa brendtiń kólikteri halyqaralyq jarystarda tanyla bastady.
Audi Type C modeli 1912, 1913 jáne 1914 jyldary Avstriia Alpi ralliinde jeńiske jetti. Sol kezeńdegi eń kúrdeli ári uzaq jarystardyń birinde qatarynan úsh ret jeńiske jetken kólikke «Alpi jeńimpazy» degen ataý berildi.
Audi keiin avtomobil óndirisine birqatar tehnikalyq jańalyq engizdi. Kompaniia 1921 jyly Germaniiadaǵy róli sol jaqta ornalasqan jáne berilis tetigi kóliktiń ortasyna qoiylǵan alǵashqy seriialyq avtomobilderdiń birin shyǵardy. Bul júrgizýshiniń joldy jaqsy baqylaýyna múmkindik berdi.
Audi logotipindegi tórt saqina neni bildiredi?
Audi ataýy 10 jastaǵy balanyń usynysynan paida bolǵanymen, brendtiń tórt saqinadan turatyn áigili logotipi keiinirek qalyptasty.
1929 jyly bastalǵan álemdik ekonomikalyq daǵdarys Germaniiadaǵy avtomobil óndirýshilerine aýyr soqqy boldy. Kompaniialardyń kúshin biriktirý maqsatynda 1932 jylǵy 29 maýsymda Audi, DKW, Horch jáne Wanderer kásiporyndary Auto Union AG birlestigin qurdy.
Audi logotipindegi bir-birimen bailanysqan tórt saqina osy tórt avtomobil óndirýshisin bildiredi:
- Audi;
- DKW;
- Horch;
- Wanderer.
Ár saqina bir kompaniiany beineleidi. Keiin tórt saqina Audi brendiniń negizgi belgisi retinde saqtalyp qaldy.
Aýgýst Horh Audi kompaniiasyn qansha ýaqyt basqardy?
Aýgýst Horh 1920 jyldardyń basynda kompaniiany kúndelikti basqarýdan alystady. Keiin ol Audiwerke AG baqylaý keńesiniń múshesi boldy. 1932 jyly Auto Union birlestigi qurylǵanda da injener jańa kompaniianyń baqylaý keńesine shaqyrylyp, tehnikalyq damý jónindegi keńesshi qyzmetin atqardy.
1985 jyly kásiporynnyń resmi ataýy AUDI AG bolyp ózgertildi. Osy kezeńnen bastap kompaniia men avtomobil markasynyń ataýy birizdendirildi.
Bir balanyń usynysy álemdik brendke ainaldy
Audi ataýynyń tarihy keide eń sátti sheshimniń kútpegen jerden shyǵatynyn kórsetedi. Tájiribeli injenerler men kásipkerler jańa kompaniiaǵa laiyq ataý taba almai otyrǵanda, 10 jastaǵy Genrih Fikentsher bir ǵana sóz usyndy.
Latyn tilindegi «Audi!» sózi keiin álemdegi eń tanymal avtomobil markalarynyń biriniń ataýyna ainaldy. Al kishkentai Genrihtiń qarapaiym usynysy avtomobil ónerkásibiniń tarihynda máńgi qaldy.
