Álemde koronavirýstan qaitys bolǵandar júz myńnan asty. Djon Hopkins ýniversitetiniń dereginshe, 11 sáýirde virýs juqtyrǵandar 1,7 million adamǵa jetken. 102 myńnan astam adam qaitys bolǵan.
Ispaniia, Frantsiia, Italiia, Ulybritaniiada kún saiyn júzdegen adam ólip jatyr. Eýropada 64 myńnan astam adam virýstan kóz jumǵan.
AQSh-ta shamamen 18 700 adam virýstan qaitys boldy. Munda 500 myńnan astam adamnan virýs tabylǵan. Bul álem boiynsha eń joǵary kórsetkish.
10 sáýirde AQSh prezidenti Donald Tramp 100 myń adam qaitys bolýy múmkin degen dárigerler boljamymen kelispeitinin aitty. Qazir AQSh-tyń Niý-Iork Shtaty virýstan qatty zardap shegip jatyr.
Tramp juma, 10 sáýir kúngi brifing kezinde "virýspen kúresýdiń agressivti strategiiasy nátijesin kórsetti" - virýs juqtyrǵandar alǵash ret azaia bastady dep málimdedi. Ol sonymen birge 14 sáýirde AQSh ekonomikasyn qalpyna keltirý boiynsha shuǵyl top qurylatynyn aitty.
Eýropa men ózge memleketter koronavirýstyń ekonomikaǵa yqpalyn azaitý úshin shekteý sharalaryn jumsartý týraly aita bastady. Mysaly, Ispaniia kelesi aptadan bastap keibir kásiporyndardyń jumysyn qalpyna keltirýdi josparlap otyr.
Alaida densaýlyq saqtaý salasy sarapshylary shekteý sharalary jumsarsa, virýs juqtyrǵandar sany kúrt kóbeiýi múmkin dep alańdaidy.
Sarapshylar koronavirýsty anyqtaityn test jetispegendikten jáne keibir úkimetter aqparatty jasyrǵandyqtan virýs juqtyrǵandar resmi derekten áldeqaida kóp bolýy múmkin dep sanaidy.
