Álemde koronavirýs infektsiiasyn juqtyryp, saldarynan qaitys bolǵandar sany 3 millionnan asty. Bul virýs juqtyrǵany rastalǵan 140 million adamnyń 2 paiyzyn quraidy.
Qazir koronavirýstan barlyǵy 18 million adam emdelip jatyr. Onyń 106 myńynyń hali nashar. Tirkelgen naýqastardyń jalpy sany (31,3 millionnan astam) men aýrýdan qaitys bolǵandar jóninen (563 myńǵa jýyq) birinshi orynda AQSh tur. Aýrýdy baqylaý jáne aldyn alý ortalyǵynyń málimetinshe (Center for Disease Control and Prevention, CDC), elde barlyǵy 206 million adam ekpe alǵan. Onyń 82,4 milliony (halyqtyń 24,8 paiyzy) tolyq vaktsinalanǵan, 129,4 milliony (39 paiyz) vaktsinanyń kemi bir dozasyn alǵan. Biraq osyǵan qaramastan koronavirýs juqtyrýshylar sany kóbeiip barady. CDC deregine qaraǵanda, bir 16 sáýirdiń ózinde 76,6 myń naýqas tirkelgen.
Indetten qatty zardap shekken Braziliia, Úndistan jáne Frantsiia sekildi elder de qaita órshigen indettiń betin qaitarýmen álek.
Djons Hopkins ýniversitetiniń málimetinshe, keiingi aptada dúnie júzi boiynsha 12 myńnan astam ólim tirkelgen. Virýs juqtyrǵandar sany da kún saiyn artyp keledi. Qazir kúnine shamamen 700 myń adam koronavirýspen tirkelip jatyr. Budan indettiń taraýy báseńdemegenin ańǵarýǵa bolady.
«16 aidan keiingi jaǵdai mundai bolmaýy kerek edi» dedi DDSU ókili Mariia van Kerhove.
Braziliiada kúnine 3 myńǵa jýyq adam qaitys bolyp jatyr. Aýrýdan qaitys bolyp jatqan árbir tórt adamnyń biri osy eldiń úlesinde. Munda kei zirattarda túngi aýysym paida bolǵan, sebebi kór qazýshylar máiit jerlep úlgere almai jatyr.
Ulybritaniiada halyqtyń 60 paiyzdan astamy vaktsinanyń kemi bir dozasyn alǵan. Biraq elde osyǵan qaramastan aýrýdan kún saiyn 30-ǵa jýyq adam qaitys bolyp jatyr.
Eýropa juqpalyǵy joǵary britaniialyq varianttan zardap shegip jatyr. Saldarynan kontinenttegi Covid ólimi 1 millionnan asyp tústi.
Frantsiiada 6 myńǵa jýyq naýqas intensivti terapiia bóliminde emdelip jatyr. Mundai kórsetkish indet bastalǵaly bolmaǵan.
Japoniiada indettiń órshýi Olimpiada oiyndary taǵy shegerilýi múmkin degen qaýesettiń taraýyna ákeldi. Elde ekpe alyp úlgergender halyqtyń 1 paiyzyna da jetpeidi. Biraq 124 million halqy bar Japoniia koronavirýstan salystyrmaly túrde az zardap shekken elder qataryna jatady. Indet bastalǵaly elde barlyǵy 525 myń naýqas, 9 584 ólim tirkelgen.
