Astana qalasynda ótip jatqan «Ekspo-2017» Halyqaralyq mamandandyrylǵan kórmesi aiasynda M.Áýezov atyndaǵy Qazaq Memlekettik akademiialyq drama teatry 18-25 maýsym aralyǵynda óner kórsetedi.
El tarihynda qalatyn aitýly shara – «Ekspo -2017» kórmesi aiasynda kóptegen mádeni sharalar bastaý alyp, óz jalǵasyn tabýda. Álem kóz tikken bul aitýly kúnderde M.Áýezov atyndaǵy Qazaq Memlekettik akademiialyq drama teatry da belsendi atsalysyp, repertýarynan berik oryn alǵan qoiylymdardy álem jurtshylyǵynyń nazaryna usynýda. Teatr ujymy búginge deiin Astana Balet teatrynda «Beibarys Sultan», «Úmit úzgim kelmeidi» shyǵarmalaryn sahnalap, jinalǵan qaýymnyń ystyq yqylasyna bólense, aldaǵy kúnderi Jastar teatrynyń sahnasynan kórinip, kórermenin qýantpaq.
Búgin teatr ujymy ulttyq klassika qundylyǵyna jatatyn M.Áýezovtiń «Abai» tragediiasyn sahnalaidy. Rejisser Esmuhan Obaev qoiylymnyń mýzykamen kórkemdelýine basa nazar aýdarǵan. Spektaklde uly aqyn shyǵarmashlyǵynyń kompozitorlyq qyrynyń ashyla túsýine KSRO halyq artisi, professor Ǵaziza Jubanovanyń da qosqan úlesi zor. Rejisser ekeýi birlese otyryp tandemde jumys jasaǵany, qoiylym barysyndaǵy mýzykalyq kórkemdeýden birden seziledi. Sýretker jańa zamannyń, órkeniettiń bastaýy bolǵan, qoǵamdyq sananyń ilgerileýine qyzmet etken Abai bolmysyn jan-jaqty qyrynan tanytýǵa tyrysqan. Shyǵarmashylyǵy óz aldyna, el ortasyndaǵy, halyq arasyndaǵy abyroi - bedeli, ár shákirtine ustaz bola bilgen adamgershilik qasieti men óz basyndaǵy qaiǵy-qasireti (balalarynyń ólimi) qoiylym barysynda júieli órbip otyrady. Shymyldyq ashylǵannan-aq Aidar men Ajardyń daýynan bastalatyn oqiǵa, Abaidyń sahnaǵa shyǵýymen jalǵasyn tabady. Aq pen qaranyń arajigin ajyratýshy tulǵanyńjaqsyny tani bilgen kóregendigi osy tusta ańǵarylady. Qoiýshy-rejisser hakim Abaidyń ainalasynda bolyp atqan jaǵdaiattar arqyly, nadandyqpen kúresken bas keiipkerdiń beinesin kúreskerlik rýhqa baǵyttaǵan.
Zańǵar jazýshy Muhtar Áýezov «Abai joly» romany arqyly Abai beinesin álem jurtshylyǵyna tanystyrsa, Áýezov teatry Abaidy sahnadan sóiletip, uly tulǵanyń ómiri men ónegesin álemniń túkpir-túkpirinen kelgen qonaqtardyń aldynda pash etpek.
