Búgin Serbiia astanasy Belgrad qalasynda bastalǵan bokstan álem chempionatynda otandasymyz Serik Temirjanov alǵashqy jekpe-jegin ótkizdi, dep habarlaidy QazAqparat.
Qazaqstandyq boksshy 57 kelide mońǵoliialyq Enh-Amar Harhýýmen qolǵap túiistirdi. Birinshi raýndta sharshy alań jiegindegi tórt tóreshi Seriktiń basym túskenin kórsetti. Ekinshi raýndta tóreshiler biraýyzdan qazaqstandyq sportshynyń jeńgenin atap ótti. Úshinshi raýndta da tóreshiler osyndai sheshimge keldi.
Osylaisha Serik jarystyń 1/16 finalyna joldama aldy.
Temirjanov 1998 jyly dúniege kelgen. Buǵan deiin ol 2020 jylǵy Tokio Olimpiadasynda baq synady.
Sondai-aq, búgin taǵy bir jekpe-jekte Abylaihan Júsipov (67 keli) Taibeiden kelgen Iu Linmen sheberlik baiqasady.
Eske salsaq, ulttyq quramanyń bas bapkeri Qairat Sátjanov dúbirli dodada olardan basqa Temirtas Júsipov (48 keli), Sáken Bibosynov (51 keli), Mahmýd Sabyrhan (54 keli), Samatali Tóltaev (60 keli), Sanatali Tóltaev (63,5 keli), Aslanbek Shymbergenov (71 keli), Nurqanat Rais (75 keli), Nurbek Oralbai (80 keli), Bek Nurmaǵambet (86 keli), Aibek Oralbai (92 keli) men Nurlan Saparbai (92 keliden joǵary) syndy sportshylarǵa senim artty.
Biyl álem chempionatyna 100-den astam elden 650-ge jýyq sportshy keledi. Jarysqa Olimpiada chempiondary, Aziia, Eýropa júldegerleri, álem chempiondary da qatysady dep kútilýde.
Álem chempionaty 6 qarashada máresine jetedi.
