بٷگٸن سەربييا استاناسى بەلگراد قالاسىندا باستالعان بوكستان ەلەم چەمپيوناتىندا وتانداسىمىز سەرٸك تەمٸرجانوۆ العاشقى جەكپە-جەگٸن ٶتكٸزدٸ, دەپ حابارلايدى قازاقپارات.
قازاقستاندىق بوكسشى 57 كەلٸدە موڭعولييالىق ەنح-امار حارحۋۋمەن قولعاپ تٷيٸستٸردٸ. بٸرٸنشٸ راۋندتا شارشى الاڭ جيەگٸندەگٸ تٶرت تٶرەشٸ سەرٸكتٸڭ باسىم تٷسكەنٸن كٶرسەتتٸ. ەكٸنشٸ راۋندتا تٶرەشٸلەر بٸراۋىزدان قازاقستاندىق سپورتشىنىڭ جەڭگەنٸن اتاپ ٶتتٸ. ٷشٸنشٸ راۋندتا دا تٶرەشٸلەر وسىنداي شەشٸمگە كەلدٸ.
وسىلايشا سەرٸك جارىستىڭ 1/16 فينالىنا جولداما الدى.
تەمٸرجانوۆ 1998 جىلى دٷنيەگە كەلگەن. بۇعان دەيٸن ول 2020 جىلعى توكيو وليمپياداسىندا باق سىنادى.
سونداي-اق, بٷگٸن تاعى بٸر جەكپە-جەكتە ابىلايحان جٷسٸپوۆ (67 كەلٸ) تايبەيدەن كەلگەن يۋ لينمەن شەبەرلٸك بايقاسادى.
ەسكە سالساق, ۇلتتىق قۇرامانىڭ باس باپكەرٸ قايرات سەتجانوۆ دٷبٸرلٸ دودادا ولاردان باسقا تەمٸرتاس جٷسٸپوۆ (48 كەلٸ), سەكەن بيبوسىنوۆ (51 كەلٸ), ماحمۋد سابىرحان (54 كەلٸ), ساماتالي تٶلتاەۆ (60 كەلٸ), ساناتالي تٶلتاەۆ (63,5 كەلٸ), اسلانبەك شىمبەرگەنوۆ (71 كەلٸ), نۇرقانات رايس (75 كەلٸ), نۇربەك ورالباي (80 كەلٸ), بەك نۇرماعامبەت (86 كەلٸ), ايبەك ورالباي (92 كەلٸ) مەن نۇرلان ساپارباي (92 كەلٸدەن جوعارى) سىندى سپورتشىلارعا سەنٸم ارتتى.
بيىل ەلەم چەمپيوناتىنا 100-دەن استام ەلدەن 650-گە جۋىق سپورتشى كەلەدٸ. جارىسقا وليمپيادا چەمپيوندارى, ازييا, ەۋروپا جٷلدەگەرلەرٸ, ەلەم چەمپيوندارى دا قاتىسادى دەپ كٷتٸلۋدە.
ەلەم چەمپيوناتى 6 قاراشادا مەرەسٸنە جەتەدٸ.
