Densaýlyq saqtaý ministri Aleksei Tsoi Shanhai yntymaqtastyq uiymyna múshe memleketterdiń densaýlyq saqtaý ministrlerin KVI jaǵdaiyn jańasha sanaý ádisi boiynsha Dúniejúzilik densaýlyq saqtaý uiymynyń usynysyn qoldaýǵa shaqyrdy, dep habarlaidy QazAqparat.
«Densaýlyq saqtaý ministrligi Qazaqstanda koronavirýs infektsiiasyn juqtyrý boiynsha statistikalyq málimetterdi tirkeýdiń jańa ádisin aiqyndady. DDSU-nyń Eýropalyq aimaqtyq biýrosymen tehnikalyq jaǵynan keńese otyryp, biz KVI jaǵdailaryn halyqaralyq klassifikatsiianyń jańa kodymen tirkeý týraly sheshimge keldik. Osylaisha COVID-19 jaǵdailarynyń zerthanalyq turǵyda rastalýy pnevmoniia faktilerimen biriktiriledi. Buǵan deiin de, qazir de Qazaqstanda juqtyrý kórsetkishi zerthanalyq turǵyda rastalý jaǵdaiymen eseptelip otyr. Jańasha sanaý ádisine biz 1 tamyzdan bastap kóshemiz», - dedi Aleksei Tsoi ShYU múshe memleketterdiń densaýlyq saqtaý ministrleriniń otyrysynda.
Qazaqstannyń Densaýlyq saqtaý ministri jańa tásil Qazaqstannyń reitingine jaǵymsyz áser etetinin bilip otyrǵanyn jetkizdi.
«Degenmen, bul ádis aýrýdy eńserýde durys boljam jasaýǵa, resýrstardy durys bólýge múmkindik beredi. Bul – bizdiń memlekettiń ashyq saiasatyn, koronavirýsqa birige qarsy turýǵa daiyn ekenin kórsetedi. DDSU-nyń usynysyn qabyldaý – basqa memleketterge de úlgi bolar degen senimdemiz», - dedi ol.
Aleksei Tsoi statistikalyq málimetterdi júrgizýdiń bul ádisin DDSU Eýropa biýrosy qoldap otyrǵanyn jetkizdi.
«Shanhai yntymaqtastyq uiymyna múshe memleketterdi Dúniejúzilik densaýlyq saqtaý uiymynyń osy usynysyn qoldaýǵa shaqyramyn. Bul modelge memleketter neǵurlym kóp aralassa, fakt boiynsha naqty málimet negizinde saiasatty qalyptastyrýda ashyqtyq qamtamasyz etiledi», - dedi ol.
