Reseide qamaýda otyrǵan oppozitsiialyq saiasatker Aleksei Navalnyi túzetý mekemesiniń musylmandar úshin qasietti kitap sanalatyn Qurandy oqýǵa bermegeni úshin koloniiany sotqa berdi. Seisenbi kúni onyń Instagramdaǵy paraqshasynda sol týraly habarlama jariialandy.
"Maǵan Quran kitabymdy bermei jatyr. Jynyńa tiedi. Meni jańadan túrmege otyrǵyzǵan kezde óz-ózimdi damytý úshin tizim qurastyrǵanmyn. Sondaǵy pýnkterdiń biri: Quran men Paiǵambar Súnnetin tereń zerttep, túsiný bolatyn" dep jazdy Navalnyi.
Ol jazbada islamdy túsinip qana qoimai, Qurandy jattaýǵa da bekingenin jetkizgen. Biraq saiasatkerdiń aitýynsha, №2 Pokrov koloniiasy ákimshiligi sottalýshylarǵa kitap bermeidi, tipti ózimen ákelgen kitaptardy da alý qiynnyń qiyny. Reseilik aqparat quraldarynyń jazýynsha, buǵan deiin ol úsh apta ishinde Bibliiaǵa áreń qol jetkizgen. Jazbaǵa qaraǵanda Navalnyi ustalǵan kezde ózimen birge ákelgen kitaptar arasynda Quran da bolǵan.
"Mine, túrme bastyǵyna kezekti aryz jazyp, sotqa berdim. Qansha ýaqyt shydaýǵa bolady? Maǵan endi Quran oqýǵa da bolmai ma ne? Onyń ústine ashtyq jariialaǵanyma 13 kún boldy, filosofiialyq kóńil kúide júrmin" dedi ol.
Degenmen Reseidiń aqparat quraldary ázirge sot saitynan Navalnyidyń shaǵymyn taba almaǵan.
- 2 aqpanda Máskeýdiń Simonov soty Aleksei Navalnyidy 2013 jyly "Iv Roshe isi" boiynsha shyqqan shartty jaza erejelerin oryndamady dep saiasatkerdi túrmege jibergen. Eýropanyń Adam quqyǵy jónindegi soty istiń saiasilanǵanyn aitqan. Oppozitsioner túrmede shamamen 2,5 jyl bolady.
- Naýryz aiynyń ortasynda Navalnyi beli men aiaǵynyń aýyratynyna shaǵymdanǵan. 31 naýryzda ózine qajetti dárejede meditsinalyq kómek kórsetilmei jatqanyn málimdep, ashtyq jariialaǵan. Kompiýter tomografiiasy onyń omyrtqa diskisinde "gryja" baryn kórsetken. Osyǵan deiin saiasatker "respiratorlyq aýrý belgilerimen" túrmeniń meditsinalyq bólimine jatqyzylǵan. Ol advokattaryna otriadtaǵy 15 adamnyń úsheýinen túbirkúlez anyqtalyp, aýrýhanaǵa túskenin habarlaǵan. Al túrme dárigerleri Navalnyidyń ózi de qatty jótelip, dene qyzýy joǵary bolǵanyn aitqan.
- Naýryz aiynyń sońynda myńnan astam dáriger bilikke ashyq hat jazyp, saiasatkerge táýelsiz dárigerdi kirgizýge shaqyrǵan.
- Federaldyq qylmystyq jazany oryndaý komiteti (FSIN) oǵan kómek kórsetilip jatqanyn alǵa tartady.
