رەسەيدە قاماۋدا وتىرعان وپپوزيتسييالىق ساياساتكەر الەكسەي ناۆالنىي تٷزەتۋ مەكەمەسٸنٸڭ مۇسىلماندار ٷشٸن قاسيەتتٸ كٸتاپ سانالاتىن قۇراندى وقۋعا بەرمەگەنٸ ٷشٸن كولونييانى سوتقا بەردٸ. سەيسەنبٸ كٷنٸ ونىڭ ينستاگرامداعى پاراقشاسىندا سول تۋرالى حابارلاما جارييالاندى.
"ماعان قۇران كٸتابىمدى بەرمەي جاتىر. جىنىڭا تيەدٸ. مەنٸ جاڭادان تٷرمەگە وتىرعىزعان كەزدە ٶز-ٶزٸمدٸ دامىتۋ ٷشٸن تٸزٸم قۇراستىرعانمىن. سونداعى پۋنكتەردٸڭ بٸرٸ: قۇران مەن پايعامبار سٷننەتٸن تەرەڭ زەرتتەپ, تٷسٸنۋ بولاتىن" دەپ جازدى ناۆالنىي.
ول جازبادا يسلامدى تٷسٸنٸپ قانا قويماي, قۇراندى جاتتاۋعا دا بەكٸنگەنٸن جەتكٸزگەن. بٸراق ساياساتكەردٸڭ ايتۋىنشا, №2 پوكروۆ كولونيياسى ەكٸمشٸلٸگٸ سوتتالۋشىلارعا كٸتاپ بەرمەيدٸ, تٸپتٸ ٶزٸمەن ەكەلگەن كٸتاپتاردى دا الۋ قيىننىڭ قيىنى. رەسەيلٸك اقپارات قۇرالدارىنىڭ جازۋىنشا, بۇعان دەيٸن ول ٷش اپتا ٸشٸندە بيبليياعا ەرەڭ قول جەتكٸزگەن. جازباعا قاراعاندا ناۆالنىي ۇستالعان كەزدە ٶزٸمەن بٸرگە ەكەلگەن كٸتاپتار اراسىندا قۇران دا بولعان.
"مٸنە, تٷرمە باستىعىنا كەزەكتٸ ارىز جازىپ, سوتقا بەردٸم. قانشا ۋاقىت شىداۋعا بولادى? ماعان ەندٸ قۇران وقۋعا دا بولماي ما نە? ونىڭ ٷستٸنە اشتىق جارييالاعانىما 13 كٷن بولدى, فيلوسوفييالىق كٶڭٸل كٷيدە جٷرمٸن" دەدٸ ول.
دەگەنمەن رەسەيدٸڭ اقپارات قۇرالدارى ەزٸرگە سوت سايتىنان ناۆالنىيدىڭ شاعىمىن تابا الماعان.
- 2 اقپاندا مەسكەۋدٸڭ سيمونوۆ سوتى الەكسەي ناۆالنىيدى 2013 جىلى "يۆ روشە ٸسٸ" بويىنشا شىققان شارتتى جازا ەرەجەلەرٸن ورىندامادى دەپ ساياساتكەردٸ تٷرمەگە جٸبەرگەن. ەۋروپانىڭ ادام قۇقىعى جٶنٸندەگٸ سوتى ٸستٸڭ ساياسيلانعانىن ايتقان. وپپوزيتسيونەر تٷرمەدە شامامەن 2,5 جىل بولادى.
- ناۋرىز ايىنىڭ ورتاسىندا ناۆالنىي بەلٸ مەن اياعىنىڭ اۋىراتىنىنا شاعىمدانعان. 31 ناۋرىزدا ٶزٸنە قاجەتتٸ دەرەجەدە مەديتسينالىق كٶمەك كٶرسەتٸلمەي جاتقانىن مەلٸمدەپ, اشتىق جارييالاعان. كومپيۋتەر توموگرافيياسى ونىڭ ومىرتقا ديسكٸسٸندە "گرىجا" بارىن كٶرسەتكەن. وسىعان دەيٸن ساياساتكەر "رەسپيراتورلىق اۋرۋ بەلگٸلەرٸمەن" تٷرمەنٸڭ مەديتسينالىق بٶلٸمٸنە جاتقىزىلعان. ول ادۆوكاتتارىنا وتريادتاعى 15 ادامنىڭ ٷشەۋٸنەن تٷبٸركٷلەز انىقتالىپ, اۋرۋحاناعا تٷسكەنٸن حابارلاعان. ال تٷرمە دەرٸگەرلەرٸ ناۆالنىيدىڭ ٶزٸ دە قاتتى جٶتەلٸپ, دەنە قىزۋى جوعارى بولعانىن ايتقان.
- ناۋرىز ايىنىڭ سوڭىندا مىڭنان استام دەرٸگەر بيلٸككە اشىق حات جازىپ, ساياساتكەرگە تەۋەلسٸز دەرٸگەردٸ كٸرگٸزۋگە شاقىرعان.
- فەدەرالدىق قىلمىستىق جازانى ورىنداۋ كوميتەتٸ (فسين) وعان كٶمەك كٶرسەتٸلٸپ جاتقانىن العا تارتادى.
