«Atameken» ulttyq kásipkerler palatasy biznesti memleket tarapynan qoldaýdyń sharalaryn bekitpekshi. Palata tóralqasynyń tóraǵasy Raiymbek Batalov daǵdarysqa qarsy sharalar jónindegi shuǵyl shtabtyń jumysy týraly tikelei efir barysynda osynai málimet aitty, dep habarlaidy QazAqparat.
«Bizge naqty usynystar, sonyń ishinde biznesten usynystar alý mańyzdy. Men bárine naqty aita alamyn, qol qýsyryp, qarap otyrǵan joqpyz. Usynystar daiyndap jatyrmyz. Usynatyn qoldaý sharalaryn qorǵap baǵamyz», – dedi ol kásipkerlerdiń salyq demalystary men nesie tólemderin keiinge qaldyrý týraly suraqtaryna bergen jaýabynda.
Sondai-aq, ol shuǵyl shtab jumysyna palatanyń búkil qurylymy tartylǵanyn atap ótti.
«Sebebi qazir túrli uiymdastyrýshylyq máselelerdi keiinge qaldyrý kerek. Kóptegen kásipkerler Reseige qarsy sanktsiialardyń kúshine enýine bailanysty aitarlyqtai qiyndyqtarǵa tap bola bastady. Atap aitqanda, kóbiniń júkteri shekara arqyly ótken kezde kesheýildep jatyr. Birinshi kezekte, osyndai máselelerdi sheshý kerek. Aldaǵy aptada biz biznestiń shyǵyndaryn óteý týraly másele qoiamyz. Shyǵyndardy óteý mikrokásiporyndarǵa osy ýaqytqa deiin qoldanylyp kelgen paiyzdyq mólsherlemeni sýbsidiialaý túrinde, iri kásiporyndarǵa qoldanystaǵy baǵdarlamalar boiynsha nesielerdi kepildendirý, teńge baǵamymen bailanysty shyǵyndardy óteý siiaqty sharalardy qamtýy múmkin», - dedi Raiymbek Batalov.
