«اتامەكەن» ۇلتتىق كەسٸپكەرلەر پالاتاسى بيزنەستٸ مەملەكەت تاراپىنان قولداۋدىڭ شارالارىن بەكٸتپەكشٸ. پالاتا تٶرالقاسىنىڭ تٶراعاسى رايىمبەك باتالوۆ داعدارىسقا قارسى شارالار جٶنٸندەگٸ شۇعىل شتابتىڭ جۇمىسى تۋرالى تٸكەلەي ەفير بارىسىندا وسىناي مەلٸمەت ايتتى, دەپ حابارلايدى قازاقپارات.
«بٸزگە ناقتى ۇسىنىستار, سونىڭ ٸشٸندە بيزنەستەن ۇسىنىستار الۋ ماڭىزدى. مەن بەرٸنە ناقتى ايتا الامىن, قول قۋسىرىپ, قاراپ وتىرعان جوقپىز. ۇسىنىستار دايىنداپ جاتىرمىز. ۇسىناتىن قولداۋ شارالارىن قورعاپ باعامىز», – دەدٸ ول كەسٸپكەرلەردٸڭ سالىق دەمالىستارى مەن نەسيە تٶلەمدەرٸن كەيٸنگە قالدىرۋ تۋرالى سۇراقتارىنا بەرگەن جاۋابىندا.
سونداي-اق, ول شۇعىل شتاب جۇمىسىنا پالاتانىڭ بٷكٸل قۇرىلىمى تارتىلعانىن اتاپ ٶتتٸ.
«سەبەبٸ قازٸر تٷرلٸ ۇيىمداستىرۋشىلىق مەسەلەلەردٸ كەيٸنگە قالدىرۋ كەرەك. كٶپتەگەن كەسٸپكەرلەر رەسەيگە قارسى سانكتسييالاردىڭ كٷشٸنە ەنۋٸنە بايلانىستى ايتارلىقتاي قيىندىقتارعا تاپ بولا باستادى. اتاپ ايتقاندا, كٶبٸنٸڭ جٷكتەرٸ شەكارا ارقىلى ٶتكەن كەزدە كەشەۋٸلدەپ جاتىر. بٸرٸنشٸ كەزەكتە, وسىنداي مەسەلەلەردٸ شەشۋ كەرەك. الداعى اپتادا بٸز بيزنەستٸڭ شىعىندارىن ٶتەۋ تۋرالى مەسەلە قويامىز. شىعىنداردى ٶتەۋ ميكروكەسٸپورىندارعا وسى ۋاقىتقا دەيٸن قولدانىلىپ كەلگەن پايىزدىق مٶلشەرلەمەنٸ سۋبسيدييالاۋ تٷرٸندە, ٸرٸ كەسٸپورىندارعا قولدانىستاعى باعدارلامالار بويىنشا نەسيەلەردٸ كەپٸلدەندٸرۋ, تەڭگە باعامىمەن بايلانىستى شىعىنداردى ٶتەۋ سيياقتى شارالاردى قامتۋى مٷمكٸن», - دەدٸ رايىمبەك باتالوۆ.
