Memleket basshysy Qasym-Jomart Toqaev Úkimet biýdjettiń turaqty bolýyn qamtamasyz etýi kerek ekenin aitty, dep habarlaidy "Ult aqparat" Aqordanyń baspasóz qyzmetine silteme jasap.
«Kelesi másele – biýdjet saiasaty. Úkimet biýdjettiń turaqty bolýyn qamtamasyz etýi kerek. Ulttyq qordyń transfertine táýeldilikten birtindep qutylýymyz qajet. Bir jyldan keiin Ulttyq qordyń investitsiialyq tabysynyń jartysyn balalardyń esepshotyna aýdara bastaimyz. Sol kezde barsha azamattar Ulttyq qordaǵy ahýaldy jiti qadaǵalap otyratyn bolady.
«Árbir azamat – ulttyq bailyqtyń iesi» degen sóz jai uran emes. Bul naǵyz halyqtyq, qoǵamdyq baqylaýdyń bastalǵanyn bildiredi. Úkimet te, Ulttyq bank te muny jete túsinýi kerek. Taǵy da esterińizge salamyn, aldaǵy 7 jylda Ulttyq qordyń aktivteri 100 milliard dollarǵa jetýge tiis. Sondyqtan aqshany azyraq jumsap, kóbirek tabys tabý kerek. Qazir bul máselede olqylyqtar bar.
Ulttyq qordyń investitsiialyq kirisi ózge elderdiń mundai qorlarymen salystyrǵanda áldeqaida tómen. Ulttyq qordyń jyldyq tabysy sońǵy 10 jylda 1,6 paiyz boldy. Singapýrdaǵy osyndai qor 6,4 al Norvegiianyń qory 7,5 paiyz tabys tapqan. Demek, bizdegi qordy basqarý mindetin atqaratyn organnyń jumysy aitarlyqtai tiimdi dep aitýǵa bolmaidy.
Ulttyq bankke Úkimetpen birlesip, Ulttyq qordy basqarý isin jetildirý týraly usynys engizýdi tapsyramyn. Onda men aityp ótken kemshilikter túgel eskerilýge tiis» - dedi Prezident Úkimettiń keńeitilgen otyrysynda.
