مەملەكەت باسشىسى قاسىم-جومارت توقاەۆ ٷكٸمەت بيۋدجەتتٸڭ تۇراقتى بولۋىن قامتاماسىز ەتۋٸ كەرەك ەكەنٸن ايتتى, دەپ حابارلايدى "ۇلت اقپارات" اقوردانىڭ باسپاسٶز قىزمەتٸنە سٸلتەمە جاساپ.
«كەلەسٸ مەسەلە – بيۋدجەت ساياساتى. ٷكٸمەت بيۋدجەتتٸڭ تۇراقتى بولۋىن قامتاماسىز ەتۋٸ كەرەك. ۇلتتىق قوردىڭ ترانسفەرتٸنە تەۋەلدٸلٸكتەن بٸرتٸندەپ قۇتىلۋىمىز قاجەت. بٸر جىلدان كەيٸن ۇلتتىق قوردىڭ ينۆەستيتسييالىق تابىسىنىڭ جارتىسىن بالالاردىڭ ەسەپشوتىنا اۋدارا باستايمىز. سول كەزدە بارشا ازاماتتار ۇلتتىق قورداعى احۋالدى جٸتٸ قاداعالاپ وتىراتىن بولادى.
«ەربٸر ازامات – ۇلتتىق بايلىقتىڭ يەسٸ» دەگەن سٶز جاي ۇران ەمەس. بۇل ناعىز حالىقتىق, قوعامدىق باقىلاۋدىڭ باستالعانىن بٸلدٸرەدٸ. ٷكٸمەت تە, ۇلتتىق بانك تە مۇنى جەتە تٷسٸنۋٸ كەرەك. تاعى دا ەستەرٸڭٸزگە سالامىن, الداعى 7 جىلدا ۇلتتىق قوردىڭ اكتيۆتەرٸ 100 ميلليارد دوللارعا جەتۋگە تيٸس. سوندىقتان اقشانى ازىراق جۇمساپ, كٶبٸرەك تابىس تابۋ كەرەك. قازٸر بۇل مەسەلەدە ولقىلىقتار بار.
ۇلتتىق قوردىڭ ينۆەستيتسييالىق كٸرٸسٸ ٶزگە ەلدەردٸڭ مۇنداي قورلارىمەن سالىستىرعاندا ەلدەقايدا تٶمەن. ۇلتتىق قوردىڭ جىلدىق تابىسى سوڭعى 10 جىلدا 1,6 پايىز بولدى. سينگاپۋرداعى وسىنداي قور 6,4 ال نورۆەگييانىڭ قورى 7,5 پايىز تابىس تاپقان. دەمەك, بٸزدەگٸ قوردى باسقارۋ مٸندەتٸن اتقاراتىن ورگاننىڭ جۇمىسى ايتارلىقتاي تيٸمدٸ دەپ ايتۋعا بولمايدى.
ۇلتتىق بانككە ٷكٸمەتپەن بٸرلەسٸپ, ۇلتتىق قوردى باسقارۋ ٸسٸن جەتٸلدٸرۋ تۋرالى ۇسىنىس ەنگٸزۋدٸ تاپسىرامىن. وندا مەن ايتىپ ٶتكەن كەمشٸلٸكتەر تٷگەل ەسكەرٸلۋگە تيٸس» - دەدٸ پرەزيدەنت ٷكٸمەتتٸڭ كەڭەيتٸلگەن وتىرىسىندا.
