Pavlodarda úsh jasar qyzyn uzaq ýaqyt boiy azaptap, keiin ólimine sebep boldy dep tanylǵan 26 jastaǵy er adam ómir boiyna bas bostandyǵynan aiyryldy, dep habarlaidy ult.kz.
Stan.kz jazýynsha, qaiǵyly oqiǵa 2025 jyldyń qyrkúieginde Pavlodar oblysyndaǵy Osmeryjsk aýylynda bolǵan. Tergeý málimetinshe, er adam mas kúiinde úiine kelip, qyzyn soqqyǵa jyqqan. Keiin balany kórshiniń monshasyna alyp baryp, beton edenge qatty laqtyrǵan. Aýyr jaraqat alǵan búldirshindi aýrýhanaǵa ózi jetkizgenimen, dárigerler onyń ómirin saqtap qala almady.
Sot barysynda marqum qyzdyń anasy kúieýiniń minez-qulqy uly dúniege kelgennen keiin ózgergenin aitty. Onyń sózinshe, er adam úsh jasar qyzdyń ózinen týǵanyna kúmán keltirip, sol sebepti balaǵa qatygezdik kórsetken.
Sot anyqtaǵandai, qyz bala 2025 jyldyń qańtarynan qyrkúiegine deiin turaqty túrde zorlyq-zombylyq kórgen. Tergeý derekterinde ákesiniń ony keide tósekke bailap qoiatyny jáne jii uryp-soǵatyny kórsetilgen.
Sot-meditsinalyq saraptama barysynda balanyń denesinen ár kezeńde salynǵan 36 túrli jaraqat anyqtalǵan. Sondai-aq sarapshylar sottalýshynyń «qyzym kir jýǵysh mashinanyń ústinen qulap qaldy» degen ýájin teriske shyǵardy.
Is materialdaryn qaraý kezinde sottalýshy men jubaiynyń telefonynan alynǵan, qyzdyń denesindegi soqqy izderi kórinetin fotosýretter zertteldi. Bul aiyptaýdyń mańyzdy dálelderiniń biri boldy.
Sottalýshy azaptaý faktisin ishinara moiyndaǵanymen, qyzyn qasaqana óltirgenin joqqa shyǵaryp, oqiǵany abaisyzda bolǵan jaǵdai dep túsindirýge tyrysty. Alaida sot onyń bul ýájderin qabyldamady.
Pavlodar oblysynyń qylmystyq ister jónindegi mamandandyrylǵan aýdanaralyq soty ony dármensiz kúidegi kámeletke tolmaǵan balany azaptaý jáne asa qatygezdikpen kisi óltirý baptary boiynsha kináli dep tanydy.
Sot úkimimen er adam tótenshe qaýipsizdik mekemesinde jazasyn óteýmen ómir boiyna bas bostandyǵynan aiyryldy. Sonymen qatar oǵan qaza tapqan qyzdyń anasyna 5 million teńge kóleminde moraldyq ótemaqy tóleý mindetteldi.
Úkim jariialanǵannan keiin sottalýshy ózin jaisyz sezinip, esinen tanyp qalǵan. Keiin ony konvoi qyzmetkerleri sot zalynan alyp shyqty.
