Memleket basshysy Qasym-Jomart Toqaev Alataý qalasyn damytý jónindegi keńeste sóilep, jańa shahardyń el ekonomikasy úshin strategiialyq mańyzy zor ekenin aitty, dep habarlaidy ult.kz.
Prezidenttiń sózinshe, Alataý qalasyn salý týraly sheshim eki jyl buryn qabyldanǵan jáne joba biznestiń, innovatsiianyń ári investitsiianyń jańa ortalyǵyna ainalýy tiis.
— Osy jerde ómir súrý, jumys isteý azamattarymyzǵa, ásirese, óskeleń urpaqqa mol múmkindik bermek. Sondyqtan Alataý qalasy qurylysynyń negizgi qaǵidalary jańa Konstitýtsiiaǵa engizildi, – dedi Memleket basshysy.
Toqaev búginde qala damýyna qajetti quqyqtyq negiz tolyq qalyptasqanyn atap ótti. Onyń aitýynsha, kásipkerler úshin salyqtyq jeńildikter qarastyrylyp, tsifrlyq aktivterdi damytýǵa qolaily jaǵdai jasalýda.
— Búginde Alataýdy resmi túrde biregei quqyqtyq mártebesi bar qarqyndy damityn qala dep ataýǵa bolady, – dedi Prezident.
Sonymen qatar Memleket basshysy Almaty oblysynyń ekonomikalyq kórsetkishteri jaman emes ekenin atap ótti. Byltyr óńirlik jalpy ónim kólemi 6,7 trillion teńgege jetip, 5,4 paiyzǵa ósken. Jyl basynan beri oblys ekonomikasyna 266,2 milliard teńge investitsiia tartylǵan.
Alaida Prezident óńirdegi birqatar máselelerge de toqtaldy. Ásirese Qonaev qalasyndaǵy infraqurylym qurylysynyń baiaý júrip jatqanyn synǵa aldy.
— Qonaev qalasyndaǵy infraqurylym qurylysy óte baiaý júrgizilip jatyr. "Baiaǵy jartas – sol jartas", qalanyń kelbeti ózgerissiz kúide, – dedi Qasym-Jomart Toqaev.
Memleket basshysy Alatau City jobasyna úlken úmit artatynyn aityp, ony álemdegi tabysty jańa qalalarmen salystyrdy.
— Alatau City jobasy – shyn máninde jan-jaqty zerdelenip, pysyqtalǵan joba. Biz bul bastamadan zor nátije kútemiz, – dedi ol.
Prezidenttiń aitýynsha, Alataý bolashaqta úlken derekter, jasandy intellekt jáne tsifrlyq tehnologiialarǵa negizdelgen tolyqqandy «aqyldy qalaǵa» ainalýy tiis.
— Alatau City infraqurylymy, qalalyq servisteri men ekonomikasy ózara yqpaldastyrylǵan alǵashqy tolyq tsifrlyq qala bolady, – dedi Memleket basshysy.
Sondai-aq Prezident investorlarǵa barynsha qolaily jaǵdai jasaýdy tapsyrdy.
— Bul ótinish nemese keńes emes, bul – naqty tapsyrma, – dep atap ótti Toqaev.
Keńes barysynda Memleket basshysy Alataýdy tsifrlyq aktivterdi damytý men jańa qarjy arhitektýrasyn qalyptastyrýdyń strategiialyq alańy retinde qarastyrý qajet ekenin aitty. Onyń pikirinshe, qala Ortalyq Aziiadaǵy alǵashqy kriptoqalaǵa ainalýy múmkin.
Sonymen birge Prezident óńirdegi infraqurylymdyq problemalarǵa nazar aýdaryp, jańa qalaǵa qosylǵan eldi mekenderde elektr qýatynyń jii óshýi, internettiń, sapaly joldardyń jáne ortalyqtandyrylǵan sý júiesiniń jetispeýi sekildi máseleler sheshilýi tiis ekenin aitty.
Jiyn sońynda Memleket basshysy Alataý qalasy resýrstardy únemdi paidalaný men ekologiialyq mádeniettiń úlgisi bolýy kerektigin atap ótti.
— Alataý qalasy resýrstardy ońtaily, únemdep qoldanýda úlgi bolýǵa tiis, – dedi Prezident.
Sondai-aq ol Úkimet pen ákimdikterge «Taza Qazaqstan» tujyrymdamasyn oryndaý konstitýtsiialyq mindet ekenin eske saldy.
