QR Prezidenti syilyǵynyń laýreaty, Memlekettik «Daryn» jastar syilyǵynyń iegeri, QR Mádeniet qairatkeri, filosofiia ǵylymdarynyń kandidaty Bolatbek Tólepbergenniń «Alash joly» atty kitaby jaryq kórdi. Atalǵan kitapta avtor Alash qozǵalysy men Alash ideiasy týraly paiymdaryn, iaǵni qazaq eliniń ulttyq murat-múddesin qorǵaý jolynda ómirge kelgen qoǵamdyq qubylystarǵa bailanysty óz tujyrymdaryn oqyrman nazaryna usynǵan. Alash ideiasymen sýsyndaǵan atalǵan týyndy HH ǵasyrdyń túrli kezeńderindegi ult-azattyq qozǵalystar arasyndaǵy ózara logikalyq bailanysty utymdy baiandaýymen baǵaly.
Ásirese jastarymyzǵa qajetti tarihi tanymdyq týyndy – «Alash joly» kitaby kópshiliktiń kóńilinen shyǵary anyq. Bul belgili pýblitsist, filosofiia ǵylymdarynyń kandidaty Bolatbek Tólepbergenniń ǵylymi ári pýblitsistikalyq eńbeginde jalpy ótken ǵasyrdyń basyndaǵy burq etip kóterilgen Alash qozǵalysynyń evoliýtsiialyq damý úrdisi men onyń búgingi kúnge berer taǵylymy tarazylanǵan. Jáne de «Alash qairatkerleri kimder?» degen suraqqa jaýap tabaryńyz da anyq. Atap aitqanda, Alash qozǵalysynyń kóshin bastaǵan Ahmet Baitursynov, Álihan Bókeihanov jáne Mirjaqyp Dýlatovtardan bastap, sol kezde endi ǵana aqyl toqtatqan jas tolqyn izbasarlary da qamtylǵan.
Endi kitaptyń qurylymyna az-kem toqtalsaq. Tórt taraýdan turatyn eńbektiń «Alash qozǵalysy hám Alash ideiasy» dep atalatyn birinshi taraýynda taqyryp ǵylymi-pýblitsistikalyq turǵydan taldanady. Ondaǵy «Qazaqtyń saiasi pikiriniń tarihy –qazaq jastarynyń tarihy...» dep atalatyn birinshi bóliminde Alash qozǵalysy tarihi turǵydan tarazylansa, «Alash ideiasy: Qandai ideia?» dep atalatyn ekinshi bólimde Alash ideiasy filosofiialyq turǵydan zerdelenedi. Al «Alash orda» Úkimetiniń músheleri, Alash arystary, Alashshyl jastar atty ekinshi taraýda Alash qairatkerleriniń ómirbaianyna jeke-jeke toqtalady. «Alashqa qyzmet» atty úshinshi taraýda avtor taqyrypqa sai Alash máselesinde atqarǵan naqty isterinen habar beretin jobalardy, qujattardy, hattardy t.b. toptastyrǵan. Budan avtordyń tek atalǵan taqyrypta tek zertteýshi ǵana emes, Alash máselesiniń naǵyz bilgiri ári nasihattaýshysy ekenin ańǵartady. Jáne de «Ultym dep soqqan júrekter» dep atalatyn sońǵy taraýda avtor keshegi Alash qairatkerleriniń izbasarlary ispetti búgingi ult isine bei-jai qarai almaityn aǵalary týraly maqalalaryn usynǵan.
Kitap Alash qozǵalysy men Alash avtonomiiasyna 100 jyl tolýyna arnalyp shyǵarylyp otyr. Myń dana taralymmen jaryq kórgen atalǵan kitap Alash qairatkerleriniń sýretterimen bezendirilgen. Eńbek Alash ideiasyna qyzyǵýshylyq tanytqan barsha oqyrmanǵa, jastarǵa, joǵary oqý oryndarynyń stýdentterine arnalǵan.
