2021 jyly elimizdegi aqyly joldardan 8 mlrd teńge qarjy túsken. Ol tabys qaida ketip jatyr? Atalǵan saýalǵa «QazAvtoJol» ulttyq kompaniiasynyń aqyly joldar direktsiiasy direktorynyń orynbasary Sáken Ádilbekov jaýap berdi, dep habarlaidy QazAqparat.
«Ótken jyldyń qorytyndysy boiynsha aqyly joldardan 8 mlrd teńge tóńireginde qarjy tústi. Tutynýshylar tarapynan aqyly joldan túsken tabys qaida ketip jatyr? degen saýal týyndap jatady. Aqyly joldardan túsken aqy, sol joldardy kútip baptaý men sapasyn arttyra túsýge jumsalady. Mysaly, bir aqyly jol beketin alaiyq. Ol beketti foto jáne beinebaqylaý kamerasymen qamtý, sondai-aq beketke elektr jelisi men internet tartý máselesi bar. Odan bólek, beket aýmaǵynda meteostantsiia qoiý máselesi qaralyp jatyr. Ol degenimiz ne? Ózderińiz bilesizder, elimizdiń soltústik aýmaǵynda qystygúni bir oblystyń ózinde aýa raiy ártúrli bolyp jatady. Iaǵni Aqmola oblysynyń bir aýdanynda boran bolsa, basqa aýdanda aiaz soǵyp turady. Biz búginde aýa raiyn ózimiz anyqtap, jetkizip otyramyz. Aldaǵy ýaqytta ol jumys meteostantsiianyń kómegimen avtomatty túrde anyqtalatyn bolady», - dedi Sáken Ádilbekov «QazAvtoJol» ulttyq kompaniiasy uiymdyrǵan baspasóz týry barysynda.
Onyń aitýynsha, aqyly joldardan túsken qarjynyń 80 paiyzy sol joldardy damyta túsýge jumsalady.
«Ótken jyldyń qarasha aiynda elimizdegi aqyly joldardyń qatary taǵy 7 jol ýchaskesimen tolyqty. Árine, joldy aqyly etkennen keiin, onyń sapasy men infraqurylymy soǵan sáikes bolýy kerek. Mine, aqyly joldan túsken qarajat jol sapasyn arttyrýǵa jumsalyp jatyr. Árine, joldan túsken tabys boiynsha salyq tólenedi. Degenmen túsken qarjynyń deni joldy kútip-baptaýǵa baǵyttalady», - deidi ol.
