Aqyly jol boiynda synyp qalǵan kólikti evakýator baratyn jerine deiin tegin jetkizip beredi. Bul týraly «QazAvtoJol» ulttyq kompaniiasynyń aqyly joldar direktsiiasy direktorynyń orynbasary Sáken Ádilbekov BAQ ókilderine arnalǵan baspasóz týry barysynda málim etti, dep habarlaidy QazAqparat tilshisi.
«Eger sizdiń kóligińiz aqyly jol boiynda synyp qalǵan jaǵdaida, biz ony bara jatqan jerińizge tegin jetkizip beretin bolamyz. Iaǵni aqysyz evakýatsiialaimyz. Bul másele qazir qaralyp jatyr. Atalǵan shara jospar boiynsha biyl iske qosylmaq. Qosymsha habar beriledi. Negizi jolda buzylyp qalǵan nemese jol-kólik oqiǵasyna tap bolǵan kólikterdi evakýatsiialaý buǵan deiin de bar qyzmet. Oqys oqiǵa bolǵan jaǵdaida bizdiń mamandar únemi qol ushyn sozady», - dedi Sáken Ádilbekov tilshilerdiń saýalyna jaýap bere turyp.
Odan bólek, ulttyq kompaniia ókili qolaisyz aýa raiy týraly eskertýge qulaq aspai, jolǵa shyqqan kólik ielerine aiyppul salý máselesine qatysty pikir bildirdi.
«Biz bul bastamany qoldaimyz. Nege? Sebebi biz úshin bastysy adamnyń qaýipsizdigi. Jolaýshylardyń ómir qaýipsizdigi birinshi kezekti. Sondyqtan jolǵa shyǵar aldynda aýa raiyna mán berip, qolaisyz bolǵan jaǵdaida sapardan bas tartýǵa keńes beremiz. Eger atalǵan shara zań aiasynda qabyldanyp jatsa quba-qup qoldaimyz», - deidi ol.
