Biyl Aqtóbe oblysy boiynsha aýyl sharýashylyǵy maqsatyndaǵy 38 myń gektardan astam jer memleket menshigine qaitaryldy. Oblystyq jerdiń paidalanylýy men qorǵalýyn baqylaý jónindegi basqarma jerdi maqsatty paidalanbaǵan sharýalarǵa aiyppul salyp jatyr, dep habarlaidy QazAqparat tilshisi.
Jerdiń maqsatty paidalanylýyn baqylaityn basqarma sotqa aryz túsirip, bos jatqan jerlerdi qaitaryp jatyr.
«Biyl 126 agroqurylymǵa baqylaý júrgizip, jerdiń paidalanylýyn qarap shyqtyq. Aýyl sharýashylyǵy maqsatyndaǵy 38 myń gektar jerdi sharýalar óz erkimen memleket menshigine qaitardy. Sonymen qatar, 14 sharýaǵa 2 million teńge aiyppul salyndy. Qazirgi ýaqytta úsh sharýashylyq boiynsha ákimshilik is sotta qaralyp jatyr. Jerdi maqsatty paidalanbai otyrǵan sharýalar óz erkimen memleket menshigine jerdi qaitarmasa, májbúrlep qaitarý úshin talap-aryzdy ekonomikalyq sotqa joldaimyz. Qazir Baiǵanin men Mártók aýdanyndaǵy sharýalardyń jerin qaitarý isi sotta qaralyp jatyr», - dedi Aqtóbe oblystyq jerdiń paidalanylýy men qorǵalýyn baqylaý jónindegi basqarma basshysy Abdýahat Myrzalin.
Aita keteiik, memleket menshigine qaitarylǵan aýyl sharýashylyǵy maqsatyndaǵy 56 myń gektardan astam jerdiń tek 21 myń gektary qaita ainalymǵa engizilgen. Ózgesi aýdan, qalanyń bosalqy jer qorynda tur.
