بيىل اقتٶبە وبلىسى بويىنشا اۋىل شارۋاشىلىعى ماقساتىنداعى 38 مىڭ گەكتاردان استام جەر مەملەكەت مەنشٸگٸنە قايتارىلدى. وبلىستىق جەردٸڭ پايدالانىلۋى مەن قورعالۋىن باقىلاۋ جٶنٸندەگٸ باسقارما جەردٸ ماقساتتى پايدالانباعان شارۋالارعا ايىپپۇل سالىپ جاتىر, دەپ حابارلايدى قازاقپارات تٸلشٸسٸ.
جەردٸڭ ماقساتتى پايدالانىلۋىن باقىلايتىن باسقارما سوتقا ارىز تٷسٸرٸپ, بوس جاتقان جەرلەردٸ قايتارىپ جاتىر.
«بيىل 126 اگروقۇرىلىمعا باقىلاۋ جٷرگٸزٸپ, جەردٸڭ پايدالانىلۋىن قاراپ شىقتىق. اۋىل شارۋاشىلىعى ماقساتىنداعى 38 مىڭ گەكتار جەردٸ شارۋالار ٶز ەركٸمەن مەملەكەت مەنشٸگٸنە قايتاردى. سونىمەن قاتار, 14 شارۋاعا 2 ميلليون تەڭگە ايىپپۇل سالىندى. قازٸرگٸ ۋاقىتتا ٷش شارۋاشىلىق بويىنشا ەكٸمشٸلٸك ٸس سوتتا قارالىپ جاتىر. جەردٸ ماقساتتى پايدالانباي وتىرعان شارۋالار ٶز ەركٸمەن مەملەكەت مەنشٸگٸنە جەردٸ قايتارماسا, مەجبٷرلەپ قايتارۋ ٷشٸن تالاپ-ارىزدى ەكونوميكالىق سوتقا جولدايمىز. قازٸر بايعانين مەن مەرتٶك اۋدانىنداعى شارۋالاردىڭ جەرٸن قايتارۋ ٸسٸ سوتتا قارالىپ جاتىر», - دەدٸ اقتٶبە وبلىستىق جەردٸڭ پايدالانىلۋى مەن قورعالۋىن باقىلاۋ جٶنٸندەگٸ باسقارما باسشىسى ابدۋاحات مىرزالين.
ايتا كەتەيٸك, مەملەكەت مەنشٸگٸنە قايتارىلعان اۋىل شارۋاشىلىعى ماقساتىنداعى 56 مىڭ گەكتاردان استام جەردٸڭ تەك 21 مىڭ گەكتارى قايتا اينالىمعا ەنگٸزٸلگەن. ٶزگەسٸ اۋدان, قالانىڭ بوسالقى جەر قورىندا تۇر.
