Búgin Aqtóbe qalalyq sotynda burynǵy áieliniń betin pyshaqpen aiaýsyz tilip tastaǵan er adamǵa qatysty is boiynsha jaryssózder ótti. Prokýror aiyptalýshyny 6 jylǵa bas bostandyǵynan aiyrýdy surady, dep habarlaidy "Ult aqparat".
Qalalyq sotynda Qylmystyq kodekstiń «Densaýlyqqa qasaqana aýyr ziian keltirý» baby boiynsha is qaraldy.
Jaryssóz kezinde tilshilerdiń onlain bailanysqa shyǵýyna múmkindik jasaldy.
Sot otyrysy kezinde prokýror aiyptalýshy Bekenovti 6 jyl bas bostandyǵynan aiyryp, jazasyn óteýdi qaýipsizdigi ortasha túzetý mekemesinde belgileýdi surady.
Onyń atap ótýinshe, áieldiń betinde jaraqattan keiin qalǵan tyrtyqtar ózdigimen ketpeidi. Sondyqtan, plastikalyq operatsiia jasatý qajet. Qylmystyq is aýyr qylmystar sanatyna jatqyzylǵan.
Al jábirlenýshi Ainagúl Bekenova burynǵy kúieýin keshiretinin aitty. «Men oǵan keshirim beremin. Biraq, bostandyqqa shyqqan soń, meni mazalamaýy tiis», - dedi jaryssózde ol.
Bekenov bolsa, kinásyn moiyndap, kámeletke tolmaǵan balalary úshin bostandyǵynan aiyrmaýdy surady jáne qoiylǵan barlyq talapty oryndaýǵa ýáde etti.
Aita keteiik, oqiǵa biyl naýryz aiynda boldy. Erli-zaiypty ajyrasqan soń burynǵy kúieýi áieliniń jumys ornyna baryp, ony uryp-soqqqan, betin birneshe ret ótkir zatpen tilgen.
Keiin is tergeýge alynyp, qylmystyq is qozǵaldy. Sottalýshy óz kinásin moiyndady.
Sot úkimi erteń shyǵarylady.
