Aqtóbedegi avtobýs órti qylmystyq is emes, qaiǵyly jaǵdai. Bul týraly «Aqtóbe aqparat» ortalyǵynda ótken baspasóz máslihatynda aityldy, dep habarlaidy QazAqparat tilshisi.
Aqtóbege kelgen arnaiy komissiia túnde baspasóz máslihatyn ótkizdi. Ishki ister ministriniń orynbasary Erlan Turǵymbaev, Densaýlyq saqtaý vitse-ministri Aleksei Tsoi, Investitsiia jáne damý vitse-ministri Roman Skliar baspasóz máslihatyna qatysty.
«Jolaýshylar avtobýsy janyp, 52 adam qaza bolǵany belgili. Qazir 5 adam aýrýhanada jatyr. Olar óz kúshimen avtobýs ishinen shyǵyp úlgergen. Tiri qalǵandardyń úsheýi - Qazaqstan azamaty. Júrgizýshi Nurjan Qyrǵyzbaev - 50 jasta, ol - Ońtústik Qazaqstan oblysynyń turǵyny. Onyń kómekshisi Maqsat Pernebekov - 1985 jyly týǵan azamat. Ol da Ońtústik Qazaqstan oblysynyń týmasy. Jolaýshy Bolat Tańatarov 1986 jyly týǵan. Eki Ózbekstan azamaty da bar. Úkimet janynan qurylǵan komissiia músheleri oqiǵa ornyna baryp, jaǵdaimen tanysty. Tergeý toby áli jumys júrgizip jatyr. Onyń nátijesi jaqyn arada belgili bolady», - dedi Investitsiia jáne damý vitse-ministri Roman Skliar.
Aita keteiik, 18 qańtar kúni tańerteń Samara-Shymkent tasjolynda jol apaty bolyp, jolaýshylarǵa toly avtobýs janyp ketti. Órt kezinde 52 adam qaza bolyp, 5 adamdy kúiik shaldy. Qazir kúiik shalyp, gazǵa ýlanǵandar Aqtóbe oblystyq jedel járdem aýrýhanasynda em qabyldap jatyr. Olardyń úsheýi Qazaqstan, ekeýi Ózbekstan azamaty.
«Aýa raiynyń qolaisyzdyǵy tergeý jumystaryn qiyndatty. Qazirgi kezde 44 múrde anyqtaldy. Adamdardyń denesin qatty kúiik shalyp, keibireýlerin anyqtaý múmkin bolmai jatyr. Sondyqtan olardyń barlyǵyn Aqtóbe qalasynyń máiithanasyna ákelip, adamdardyń aty-jónin anyqtaý jumystaryn jalǵastyramyz. Taiaý kúnderi tergeý aiaqtalady. Sol kezde órttiń naqty sebebi anyq bolady. Naqtylasaq, ol jerde jol-kólik oqiǵasy bolmaǵan. Avtobýs joldyń ústinde tur. Tehnikalyq aqaýy joq. Qylmys belgileri anyqtalmady. Bul qaiǵyly jaǵdai bolýy da múmkin. Zattai aiǵaqtar, aman qalǵan adamdardyń jaýaptary osyny dáleldeidi. Órt aldymen avtobýs salonynan shyqqan. Sodan jolaýshylar ýlanyp, syrtqa der kezinde shyǵa almai qalǵan», - dedi Ishki ister ministriniń orynbasary Erlan Turǵymbaev.
Komissiia múshesi Erlan Turǵymbaevtyń aitýynsha, avtobýs ishinde júk kóp bolǵan. Birinshi qabatynda júk tielip, ekinshi qabatynda jolaýshylar otyrǵan.
«Aldyn ala belgili órt shyqqan kezde júrgizýshi jolaýshylaryn qutqarmaq bolǵan. Bul eshqandai da qylmys emes, qaiǵyly jaǵdai», - dedi Erlan Turǵymbaev.
