اقتٶبەدەگٸ اۆتوبۋس ٶرتٸ قىلمىستىق ٸس ەمەس, قايعىلى جاعداي. بۇل تۋرالى «اقتٶبە اقپارات» ورتالىعىندا ٶتكەن باسپاسٶز مەسليحاتىندا ايتىلدى, دەپ حابارلايدى قازاقپارات تٸلشٸسٸ.
اقتٶبەگە كەلگەن ارنايى كوميسسييا تٷندە باسپاسٶز مەسليحاتىن ٶتكٸزدٸ. ٸشكٸ ٸستەر مينيسترٸنٸڭ ورىنباسارى ەرلان تۇرعىمباەۆ, دەنساۋلىق ساقتاۋ ۆيتسە-مينيسترٸ الەكسەي تسوي, ينۆەستيتسييا جەنە دامۋ ۆيتسە-مينيسترٸ رومان سكليار باسپاسٶز مەسليحاتىنا قاتىستى.
«جولاۋشىلار اۆتوبۋسى جانىپ, 52 ادام قازا بولعانى بەلگٸلٸ. قازٸر 5 ادام اۋرۋحانادا جاتىر. ولار ٶز كٷشٸمەن اۆتوبۋس ٸشٸنەن شىعىپ ٷلگەرگەن. تٸرٸ قالعانداردىڭ ٷشەۋٸ - قازاقستان ازاماتى. جٷرگٸزۋشٸ نۇرجان قىرعىزباەۆ - 50 جاستا, ول - وڭتٷستٸك قازاقستان وبلىسىنىڭ تۇرعىنى. ونىڭ كٶمەكشٸسٸ ماقسات پەرنەبەكوۆ - 1985 جىلى تۋعان ازامات. ول دا وڭتٷستٸك قازاقستان وبلىسىنىڭ تۋماسى. جولاۋشى بولات تاڭاتاروۆ 1986 جىلى تۋعان. ەكٸ ٶزبەكستان ازاماتى دا بار. ٷكٸمەت جانىنان قۇرىلعان كوميسسييا مٷشەلەرٸ وقيعا ورنىنا بارىپ, جاعدايمەن تانىستى. تەرگەۋ توبى ەلٸ جۇمىس جٷرگٸزٸپ جاتىر. ونىڭ نەتيجەسٸ جاقىن ارادا بەلگٸلٸ بولادى», - دەدٸ ينۆەستيتسييا جەنە دامۋ ۆيتسە-مينيسترٸ رومان سكليار.
ايتا كەتەيٸك, 18 قاڭتار كٷنٸ تاڭەرتەڭ سامارا-شىمكەنت تاسجولىندا جول اپاتى بولىپ, جولاۋشىلارعا تولى اۆتوبۋس جانىپ كەتتٸ. ٶرت كەزٸندە 52 ادام قازا بولىپ, 5 ادامدى كٷيٸك شالدى. قازٸر كٷيٸك شالىپ, گازعا ۋلانعاندار اقتٶبە وبلىستىق جەدەل جەردەم اۋرۋحاناسىندا ەم قابىلداپ جاتىر. ولاردىڭ ٷشەۋٸ قازاقستان, ەكەۋٸ ٶزبەكستان ازاماتى.
«اۋا رايىنىڭ قولايسىزدىعى تەرگەۋ جۇمىستارىن قيىنداتتى. قازٸرگٸ كەزدە 44 مٷردە انىقتالدى. ادامداردىڭ دەنەسٸن قاتتى كٷيٸك شالىپ, كەيبٸرەۋلەرٸن انىقتاۋ مٷمكٸن بولماي جاتىر. سوندىقتان ولاردىڭ بارلىعىن اقتٶبە قالاسىنىڭ مەيٸتحاناسىنا ەكەلٸپ, ادامداردىڭ اتى-جٶنٸن انىقتاۋ جۇمىستارىن جالعاستىرامىز. تاياۋ كٷندەرٸ تەرگەۋ اياقتالادى. سول كەزدە ٶرتتٸڭ ناقتى سەبەبٸ انىق بولادى. ناقتىلاساق, ول جەردە جول-كٶلٸك وقيعاسى بولماعان. اۆتوبۋس جولدىڭ ٷستٸندە تۇر. تەحنيكالىق اقاۋى جوق. قىلمىس بەلگٸلەرٸ انىقتالمادى. بۇل قايعىلى جاعداي بولۋى دا مٷمكٸن. زاتتاي ايعاقتار, امان قالعان ادامداردىڭ جاۋاپتارى وسىنى دەلەلدەيدٸ. ٶرت الدىمەن اۆتوبۋس سالونىنان شىققان. سودان جولاۋشىلار ۋلانىپ, سىرتقا دەر كەزٸندە شىعا الماي قالعان», - دەدٸ ٸشكٸ ٸستەر مينيسترٸنٸڭ ورىنباسارى ەرلان تۇرعىمباەۆ.
كوميسسييا مٷشەسٸ ەرلان تۇرعىمباەۆتىڭ ايتۋىنشا, اۆتوبۋس ٸشٸندە جٷك كٶپ بولعان. بٸرٸنشٸ قاباتىندا جٷك تيەلٸپ, ەكٸنشٸ قاباتىندا جولاۋشىلار وتىرعان.
«الدىن الا بەلگٸلٸ ٶرت شىققان كەزدە جٷرگٸزۋشٸ جولاۋشىلارىن قۇتقارماق بولعان. بۇل ەشقانداي دا قىلمىس ەمەس, قايعىلى جاعداي», - دەدٸ ەرلان تۇرعىمباەۆ.
