Aqtóbe oblysy aýmaǵynda jol apatynan Ózbekstannyń eki azamaty qaza tapty.
Ózbekstan Tótenshe jaǵdailar ministrliginiń habarlaýynsha, jol apaty 5 naýryz kúni saǵat 10:50-de Aqtóbe oblysynyń Ólke eldi mekeni tusynda Samara – Shymkent jolynda bolǵan. Sankt-Peterbýrgten Tashkentke ketip bara jatqan Opel Astra jeńil kóligi KamAZ kóligimen soqtyǵysqan. Saldarynan Ózbekstannyń Ándijan oblysynyń 1978 jyly jáne 1975 jyly týǵan eki turǵyny qaza tapqan.
Qazir Ózbekstan quzyrly organdary marqumdardyń máiitin Aqtóbeden alyp ketý sharalaryn istep jatyr.
Qazaqstannyń batys óńirinde jyl basynan beri osymen tórtinshi ret Ózbekstan azamattary jol apatyna ushyrap otyr. 18 qańtar kúni Aqtóbe oblysynyń Yrǵyz aýdany Qalybai aýylynan 10 shaqyrym jerde jolaýshylar avtobýsy órtenip, Ózbekstannyń 52 azamaty qaza tapqan. Avtobýsta barlyǵy 57 adam – 54 jolaýshy men eki júrgizýshi bolǵan. Eki jolaýshy men úsh júrgizýshi aman qalǵan.
25 aqpanda Ońtústik Qazaqstan oblysynda tirkelgen Mercedes markaly avtobýs Reseiden kele jatqanda júrgizýshi rólge ie bola almai, avtobýs jyraǵa túsip ketip, aýdarylǵan. Saldarynan avtobýsta bolǵan Ózbekstannyń jeti azamaty túrli jaraqat alǵan. Resmi málimet boiynsha, avtobýsta 25 jolaýshy bolǵan. Naýryzdyń basynda Mańǵystaý oblysynda da jol apatynan Ózbekstannyń alty azamaty opat bolǵan.
