Aqtóbede kámeletke tolmaǵan Azat Dúsipovti pyshaqtap óltirgen Beknaz Keńshilikke sot úkimi shyqty. Ol 9 jylǵa bas bostandyǵynan aiyryldy, dep habarlaidy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy Beknaz Keńshilikke sot úkimi shyqty. Sýdia Azat Dúsipovtiń júregi, ókpesine birneshe ret pyshaq suqqan B.Keńshiliktiń oqiǵa ornynan qashyp ketkenin atap ótip, onyń qylmysqa josparly túrde barǵanyn aitty.
«Beknaz Keńshilik Qylmystyq kodekstiń «Adam óltirý» baby boiynsha aiypty dep tanylyp, 9 jylǵa bas bostandyǵynan aiyrý jazasy taǵaiyndalsyn. Jazasyn qylmystyq atqarý júiesiniń qaýipsizdigi ortasha mekemesinde ótesin», - dedi sýdia Altynbek Sabyrov.
Aita keteiik, jábirlenýshi tarap materialdyq shyǵyn retinde 3 million teńgeden astam, moraldyq shyǵyn úshin 10 million teńgeden astam aqsha surady. Sot tek 2,6 million teńge materialdyq, 3 million teńge moraldyq shyǵyndy óndirý zańdy dep sanaidy.
Buǵan deiin habarlaǵanymyzdai, Aqtóbede eki mektep túlegi arasyndaǵy ózara kelispeýshilik ólimmen aiaqtaldy. Pyshaq jaraqatynan №19 orta mekteptiń túlegi Azat Dúsipov aýrýhananyń jansaqtaý bóliminde qaza tapty. Sotqa deiingi taldaý kezinde aiyptalýshynyń qorǵaýshylary qaza bolǵan Azat Dúsipovtiń ata-anasynan keshirim surady.
Al negizgi sot otyrysy kezinde eki jigit arasyndaǵy janjal bi alańynda bastalǵany belgili boldy. Jaryssóz kezinde prokýror aiyptalýshyny 9 jylǵa bas bostandyǵynan aiyrýdy surady.
