اقتٶبەدە كەمەلەتكە تولماعان ازات دٷسٸپوۆتٸ پىشاقتاپ ٶلتٸرگەن بەكناز كەڭشٸلٸككە سوت ٷكٸمٸ شىقتى. ول 9 جىلعا باس بوستاندىعىنان ايىرىلدى, دەپ حابارلايدى قازاقپارات تٸلشٸسٸ.
اقتٶبە وبلىستىق قىلمىستىق ٸستەر جٶنٸندەگٸ مامانداندىرىلعان اۋدانارالىق سوتىندا سوتتالۋشى بەكناز كەڭشٸلٸككە سوت ٷكٸمٸ شىقتى. سۋديا ازات دٷسٸپوۆتٸڭ جٷرەگٸ, ٶكپەسٸنە بٸرنەشە رەت پىشاق سۇققان ب.كەڭشٸلٸكتٸڭ وقيعا ورنىنان قاشىپ كەتكەنٸن اتاپ ٶتٸپ, ونىڭ قىلمىسقا جوسپارلى تٷردە بارعانىن ايتتى.
«بەكناز كەڭشٸلٸك قىلمىستىق كودەكستٸڭ «ادام ٶلتٸرۋ» بابى بويىنشا ايىپتى دەپ تانىلىپ, 9 جىلعا باس بوستاندىعىنان ايىرۋ جازاسى تاعايىندالسىن. جازاسىن قىلمىستىق اتقارۋ جٷيەسٸنٸڭ قاۋٸپسٸزدٸگٸ ورتاشا مەكەمەسٸندە ٶتەسٸن», - دەدٸ سۋديا التىنبەك سابىروۆ.
ايتا كەتەيٸك, جەبٸرلەنۋشٸ تاراپ ماتەريالدىق شىعىن رەتٸندە 3 ميلليون تەڭگەدەن استام, مورالدىق شىعىن ٷشٸن 10 ميلليون تەڭگەدەن استام اقشا سۇرادى. سوت تەك 2,6 ميلليون تەڭگە ماتەريالدىق, 3 ميلليون تەڭگە مورالدىق شىعىندى ٶندٸرۋ زاڭدى دەپ سانايدى.
بۇعان دەيٸن حابارلاعانىمىزداي, اقتٶبەدە ەكٸ مەكتەپ تٷلەگٸ اراسىنداعى ٶزارا كەلٸسپەۋشٸلٸك ٶلٸممەن اياقتالدى. پىشاق جاراقاتىنان №19 ورتا مەكتەپتٸڭ تٷلەگٸ ازات دٷسٸپوۆ اۋرۋحانانىڭ جانساقتاۋ بٶلٸمٸندە قازا تاپتى. سوتقا دەيٸنگٸ تالداۋ كەزٸندە ايىپتالۋشىنىڭ قورعاۋشىلارى قازا بولعان ازات دٷسٸپوۆتٸڭ اتا-اناسىنان كەشٸرٸم سۇرادى.
ال نەگٸزگٸ سوت وتىرىسى كەزٸندە ەكٸ جٸگٸت اراسىنداعى جانجال بي الاڭىندا باستالعانى بەلگٸلٸ بولدى. جارىسسٶز كەزٸندە پروكۋرور ايىپتالۋشىنى 9 جىلعا باس بوستاندىعىنان ايىرۋدى سۇرادى.
